ისრაელი აშშ-ის შემდეგ გაეროს ადამიანის უფლებათა საბჭოდან გავიდა

ისრაელმა აშშ-ის შემდეგ გაეროს ადამიანის უფლებათა საბჭოდან გასვლის გადაწყვეტილება მიიღო. ამის შესახებ ისრაელის საგარეო საქმეთა მინისტრმა გიდეონ საარმა X-ში დაწერა. ინფორმაციას Deutche Welle ავრცელებს.

„ისრაელი მიესალმება პრეზიდენტ ტრამპის გადაწყვეტილებას, რომელმაც ადამიანის უფლებათა საბჭოდან გასვლის გადაწყვეტილება მიიღო. ისრაელი აშშ-ს უერთდება და გაეროს ადამიანის უფლებათა საბჭოს მუშაობაში მონაწილეობას არ მიიღებს“, - წერს ისრაელის საგარეო საქმეთა მინისტრი.

საარმა გაეროს „ადამიანის უფლებათა საბჭოს ადამიანის უფლებათა დამრღვევთა დაცვაში“ და ისრაელის დემონიზაციაში დაადანაშაულა, რომელიც „ახლო აღმოსავლეთში ერთადერთი დემოკრატიული ქვეყანაა“.

„ეს ორგანო დაკავებულია ანტისემიტიზმის პროპაგანდით და დემოკრატიულ ქვეყანას თავს ესხმის, იმის ნაცვლად, რომ ადამიანის უფლებების დაცვით იყოს დაკავებული“, - განაცხადა მინისტრმა.

ისრაელის საგარეო საქმეთა მინისტრმა განაცხადა, რომ მისი ქვეყნის წინააღმდეგ ასამდე ნეგატიური რეზოლუციაა მიღებული, ანუ იმაზე მეტი, ვიდრე ირანის, კუბის, ჩრდილოეთ კორეის და ვენესუელის წინააღმდეგ ერთად აღებული.

4 თებერვალს აშშ-ის პრეზიდენტმა დონალდ ტრამპმა ხელი მოაწერა ბრძანებულებას გაეროს ადამიანის უფლებათა საბჭოდან და პალესტინელი ლტოლვილების დახმარების გაეროს სააგენტოდან აშშ-ის გასვლის შესახებ. ასევე გადაიხედება აშშ-ის მონაწილეობა UNESCO-ს მუშაობაშიც.