„მოსამართლეების, პროკურორებისა და პერსონალის წინააღმდეგ მიმართული ზომები ძირს უთხრის კანონის უზენაესობას“ - ჰააგის სასამართლო აშშ-ის სანქციებს გამოეხმაურა

სისხლის სამართლის საერთაშორისო სასამართლო აშშ-ის მიერ დაწესებულ სანქციებს გამოეხმაურა და განაცხადა, რომ მოსამართლეებზე, პროკურორებსა და პერსონალზე ზეწოლა საერთაშორისო სამართლებრივ წესრიგს საფრთხეს უქმნის. ამის შესახებ ჟურნალისტებს საერთაშორისო სასამართლოს პრესსამსახურში განუცხადეს.

სისხლის სამართლის საერთაშორისო სასამართლოში ხაზგასმით აღნიშნეს, რომ როდესაც სასამართლო მოხელეებს კანონის გამოყენების გამო ემუქრებიან, „საფრთხის ქვეშ თავად საერთაშორისო სამართლებრივი წესრიგი დგება“.

„მოსამართლეების, პროკურორებისა და იმ პერსონალის წინააღმდეგ მიმართული ზომები, რომლებიც მუშაობენ სისხლის სამართლის საერთაშორისო სასამართლოსთვის სახელმწიფოების მიერ მინიჭებული მანდატის შესასრულებლად, ძირს უთხრის კანონის უზენაესობას“, - განაცხადეს სასამართლოს პრესსამსახურში.

გარდა ამისა, სასამართლოში ხაზგასმით აღნიშნეს, რომ არ აპირებენ უკან დახევას თავიანთი უფლებამოსილების შესრულებისგან და გააგრძელებენ თავიანთი თანამშრომლების, ასევე, საერთაშორისო დანაშაულების მსხვერპლთა მხარდაჭერას.

ცნობისთვის, აშშ-ის სახელმწიფო მდივანმა მარკო რუბიომ განაცხადა, რომ პრეზიდენტ ტრამპის გასული წლის აღმასრულებელი ბრძანების საფუძველზე აშშ სანქციებს უწესებს სისხლის სამართლის საერთაშორისო სასამართლოს პრეზიდენტს ტომოკო აკანეს და სასამართლოს უფროს იურისტს აბდულაიე სეიეს.