თეა წულუკიანი: დიდი ძალები ებრძვიან საქართველოს, ოპოზიცია არის სათამაშო კამათელი ამ დიდი ძალების ხელში

„დიდი ძალები ებრძვიან საქართველოს, ოპოზიცია არის სათამაშო კამათელი ამ დიდი ძალების ხელში“, - ამის შესახებ პარლამენტის თავმჯდომარის მოადგილემ თეა წულუკიანმა განაცხადა.

მისი თქმით, ივანიშვილის გამჭრიახობა და მისი პრინციპულობა, რომ არა საქართველო უკრაინაზე უარეს მდგომარეობაში იქნებოდა.

„დიდი ძალები ებრძვიან საქართველოს, ეს მე PACE-ზეც ვთქვი და გაიყურსა ყველა. 2022 წლიდან მიზანმიმართულად ვისჯებით მხოლოდ იმიტომ, რომ უარი ვთქვით კონკრეტული ოფიციალური პირების შემოთავაზებაზე, რომ ჩავრთულიყავით ომში და ვიღაცების, ამ დიდი ძალების გიჟურ ავანტიურაში მიგვეღო მონაწილეობა, რომელიც გულისხმობდა უკრაინა-საქართველოსა და კიდევ რამდენიმე ქვეყანაში ცეცხლის აალებას და ამით ვითომ რუსეთის შესუსტებას.

ეს არ იყო მოჩვენება, ეს იყო კონკრეტული ზეწოლა და შემოთავაზებები, რაზეც ბიძინა ივანიშვილის ხელმძღვანელობით ამ ხელისუფლებამ თქვა უარი. ამის შემდეგ დაიწყო სადამსჯელო ღონისძიებები თვითონ ივანიშვილის წინააღმდეგ, მისი ოჯახის წინააღმდეგ, ხელისუფლების წინააღმდეგ და თითოეული ჩვენგანის წინააღმდეგ, კოლექტიური მმართველი გუნდის წინააღმდეგ.

ჩვენ მაინც დღემდე მოვათრევთ ამ ცხოვრებით, მიუხედავად იმისა, რომ თან მოვდივართ და თან თავში გვირტყამენ, იმიტომ, რომ ჩვენ არ გვინდა უბედურება. ჩვენ თვითონ უბედურების თაობა ვართ, ჩვენ ხომ ჩვენი თვალით გვინახავს ომი.

ივანიშვილის გამჭრიახობა, მისი პრინციპულობა რომ არა, ჩვენ უკრაინაზე უარეს მდგომარეობაში ვიქნებოდით. ალბათ, დღეს აღარც ვიქნებოდით ისეთები, როგორიც ვართ, ამიტომ ისჯება საქართველო. ოპოზიცია არის სათამაშო კამათელი ამ დიდი ძალების ხელში და რა თქმა უნდა, ასეთ პირობებში მათ წერილს აქვს უფრო მეტი ჭრა“, - აღნიშნა წულუკიანმა.