უდანაშაულო მამაკაცი 42 წლიანი უკანონო პატიმრობის შემდეგ გაათავისუფლეს

კანზას-სიტიში  1978 წლის 25 აპრილს, ერთ-ერთ ოჯახში შეიჭრა რამდენიმე პირი და  სახლში  მყოფი, 20-22 წლის  სამი ახალგაზრდა მოკლა. მეოთხე მსხვერპლმა 20 წლის  სინტია დუგლასმა, სხეულის მძიმე დაზიანებებით გაქცევა მოახერხა რადგან დამნაშავეებს  ის გარდაცვლილი ეგონათ .

იმ ღამეს მისურის პოლიციამ დააკავა თინეიჯერი კევინ  სტრიკლენდი. სტრიკლენდმა პოლიციას განუცხადა, რომ ის სახლში იყო და ტელევიზორს უყურებდა.

მოგვიანებით გავრცელდა ინფორმაცია, რომ  პოლიციამ ზეწოლა მოახდინა ქალბატონ დუგლასზე,  რომ ეჭვი მასზე მიეტანა. ბიჭუნას მიუსაჯეს სამუდამო პატიმრობა პირობით ვადამდე გათავისუფლების შესაძლებლობის გარეშე.  კევინ სტრიკლენდი, უდანაშაულო ადამიანი, 42 წელზე მეტხანს იხდიდა სასჯელს  სამმაგი მკვლელობისთვის, რომელიც მას არ ჩაუდენია.  ჯექსონის ოლქის პროკურორებმა გასული წლის ნოემბერში დაიწყეს ბ-ნი სტრიკლენდის ნასამართლობის განხილვა და  მისურის ახალი კანონის მიხედვით შეიტანეს შუამდგომლობა მისი დაუყოვნებლივ  გათავისუფლების მოთხოვნით. კევინ სტრიკლენდი  პატიმრობიდან  62 წლის ასაკში გაათავისუფლეს.  

ეს იყო ყველაზე გრძელვადიანი უკანონო პატიმრობა შტატის ისტორიაში, მაგრამ  მისურის კანონის თანახმად, მას არ აქვს რაიმე ფინანსური კომპენსაციის მიღების უფლება ამიტომ, მისმა ადვოკატებმა გახსნეს GoFundMe გვერდი კევინის  ცხოვრების უზრუნველსაყოფად.  ამ დრომდე კევინ სტრიკლენდის დასახმარებლად ფონდის შემოწირულობებით  შეგროვდა 1,511,440 დოლარი.

ელენე ფერაძე