70 წლის მონაზვნის გაუპატიურებისა და ყაჩაღობის ბრალდებით დაკავებულები ბრალს არ აღიარებენ - სახელმწიფო ადვოკატი

ხაშურში, სოფელ ცხრამუხის დედათა მონასტერში, მონაზვნის ჯგუფურად გაუპატიურებისა და ყაჩაღობის ბრალდებით დაკავებული ორი პირი ბრალს არ აღიარებს. ამის შესახებ ბრალდებულების ადვოკატი, გიგა ჯეირანაშვილი აცხადებს.

ადვოკატმა ბრალდებულები წინასწარი დაკავების იზოლატორში მოინახულა. მისი თქმით, ბრალდებულები ამტკიცებენ, რომ მონასტრის ტერიტორიაზე, 25 ნოემბერს, არც ერთი მათგანი არ ყოფილა. ამასთან, ადვოკატი აღნიშნავს, რომ აღკვეთის ღონისძიების შეფარდებაზე სასამართლო, სავარაუდოდ, ხვალ იმსჯელებს.

25 ნოემბერს, ხაშურში, დედათა მონასტერს უცნობი პირები თავს დაესხნენ - გავრცელებული ინფორმაციით, ისინი მონასტრის დაყაჩაღებას ცდილობდნენ, რა დროსაც 70 წლის მონაზონზე ფიზიკურად და სექსუალურად იძალადეს.

საქართველოს პროკურატურის ინფორმაციით, სამართალდამცავებმა ბრალდებულები 26 ნოემბერს დააკავეს. მათ ბრალდება სისხლის სამართლის კოდექსის 137-ე მუხლის მე-3 ნაწილის „გ“ ქვეპუნქტით და მე-4 ნაწილის “ა” ქვეპუნქტით (გაუპატიურება, ჩადენილი ჯგუფურად, დაზარალებულის მიმართ განსაკუთრებული სისასტიკით) და 179-ე მუხლის მე-2 ნაწილის „ბ“ ქვეპუნქტით და მე-3 ნაწილის „ბ“ ქვეპუნქტით (ყაჩაღობა ჩადენილი ჯგუფურად, ბინაში (საცხოვრებელ კელიაში) უკანონო შეღწევით) წარედგინათ, რაც სასჯელის სახედ და ზომად 15-დან 20 წლამდე ან უვადო თავისუფლების აღკვეთას ითვალისწინებს.

ასევე დაგაინტერესებთ:

🔵"ყველაზე უმორალო მდიდარი ხალხია, რომელიც შვილის ფიზიკური გადარჩენისთვის კი არა, გაუმაძღრობის გამო და სრული ძალაუფლებისთვის ხვრეპს ყველას სისხლს" - ნათია ფანჯიკიძე

🔵ძალადობის მსხვერპლი მონაზონი რეანიმაციიდან პალატაში გადაიყვანეს - მისი მდგომარეობა სტაბილურად მძიმეა