ალექსანდრე წულაძე: ინკლუზიურ განათლებას საქართველოში არავითარი საფრთხე არ ემუქრება

საქართველოს განათლების, მეცნიერებისა და ახალგაზრდობის მინისტრი ეხმიანება გავრცელებულ ინფორმაციას იმის შესახებ, რომ ინკლუზიური განათლების სამმართველო გაუქმდა. ალექსანდრე წულაძის განცხადებით, ეს სიმართლეს არ შეესაბამება და სამინისტროს ერთ-ერთი პრიორიტეტი სწორედ ინკლუზიური განათლების სისტემის განვითარებაა.

მინისტრი განმარტავს, რომ გაერთიანდა სტრატეგიული დაგეგმვისა და ინკლუზიური განვითარების სამმართველო, რაც მიზნად ისახავს უწყების სტრუქტურის ოპტიმიზაციასა და ეფექტიანობის გაზრდას. ალექსანდრე წულაძის ინფორმაციით, რამდენიმე დღეში დამტკიცდება ინკლუზიური განათლების ახალი, ორწლიანი სამოქმედო გეგმაც.

„მინდა ძალიან ხმამაღლა განვაცხადო, რომ ინკლუზიურ განათლებას საქართველოში არავითარი საფრთხე არ ემუქრება. აღნიშნული ცვლილებებით, რომელიც განხორციელდა ჩვენი სამინისტროს სტრუქტურული ოპტიმიზაციის მიზნით, მხოლოდ და მხოლოდ ფუნქციური გადანაცვლება მოხდა. რაც შეეხება შინაარსობრივი და პროექტების განხორციელების თვალსაზრისით, არავითარი ცვლილება, რამაც, შესაძლოა, შელახოს ან დაკარგოს ის მხარდამჭერი ღონისძიებები, რომლებიც დღესაც ხორციელდება და კიდევ უფრო მეტი მხარდაჭერით განხორციელდება ინკლუზიური განათლების მიმართულებით, ასეთი არც განხორციელებულა და არც განხორციელდება“, - განაცხადა ალექსანდრე წულაძემ.