დავით ჩიხელიძე ოპოზიციაზე: დღევანდელი მოცემულობით სახეზე გვაქვს ერთი შეხედვით აშკარა დანაშაული და დანაშაულის ნიშნებს შეიცავს მათი ქმედებები, ეს ძალები არა თუ პოლიტიკაში უნდა იყვნენ, არამედ უნდა იყვნენ იზოლირებული

„დღევანდელი მოცემულობით, სახეზე გვაქვს ერთი შეხედვით აშკარა დანაშაული და დანაშაულის ნიშნებს შეიცავს მათი ქმედებები. ეს ძალები არა თუ პოლიტიკაში უნდა იყვნენ, არამედ უნდა იყვნენ იზოლირებული, მათ შორის შესაძლოა, სასჯელაღსრულების დაწესებულებაში“, - განაცხადა გადაცემაში „დღის ქრონიკა“ ექსპერტმა დავით ჩიხელიძემ ოპოზიციური პარტიების მიმართ შეტანილ საკონსტიტუციო სარჩელზე საუბრისას.

მისივე თქმით, თუ ეს ადამიანები პოლიტიკას ჩამოშორდებიან, ავტომატურად გამოჩნდება გარკვეული ნიშა, რომლის შევსებაც უფრო მარტივი იქნება ახალი პოლიტიკური ჯგუფებისთვის.

„დღევანდელი მოცემულობით, ჩვენ ვხედავთ, რომ როდესაც რაიმე გაერთიანება მოხდა „ნაციონალური მოძრაობის“ ირგვლივ, შესაძლოა, ვიღაც იყო ახალი პოლიტიკური პარტია, რომელიც იმ მომენტში დგამდა პირველ ნაბიჯებს, მაგრამ იმდენი მოახერხა „ნაციონალურმა მოძრაობამ“, რომ დაშლის შემდეგ ეს პარტიაც ავტომატურად გაუქმებული იყო და „ნაცებთან“ იყო შეერთებული. არც ერთ ახალ პარტიას მათ არ მისცეს საშუალება, რომ დამოუკიდებელი თამაში ეთამაშათ.

თუ ესენი აღარ იქნებიან პოლიტიკურ ველზე და მე აშკარად ვხედავ იმ დანაშაულის ნიშნებს, რაც მათ საქმიანობაში წარსულში იყო, უფრო მარტივად მოხდება გარკვეული ძალების მიერ ამ ნიშის დაკავება და შესაძლოა, ჩვენ მართლაც ვნახოთ ახალი პოლიტიკური პარტიები, რომელთა შეხედულებები იქნება იმ ამომრჩევლის შეხედულებებთან ახლოს, რომელიც არის გადაუწყვეტელი ამომრჩეველი, ან კრიტიკულად არის განწყობილი როგორც ოპოზიციის მიმართ, ასევე „ქართული ოცნების“ მიმართ“, - აღნიშნა დავით ჩიხელიძემ.