ამირან გამყრელიძე: დაიწყო "ომიკრონის" შიდა გავრცელება - ინფიცირებულთაგან 16 მოზარდია

"საქართველოში ამ დროისთვის კორონავირუსის „ომიკრონ“ ვარიანტის 253 შემთხვევაა დადასტურებული, თუმცა ამ შტამით ინფიცირებულთა რეალური მაჩვენებელი სამ-ოთხჯერ მეტია", – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა.

გამყრელიძის ინფორმაციით, ინფიცირებულთა შორის 18 წლამდე ასაკის ბავშვი და მოზარდი 16-ია.

გამყრელიძის განცხადებით, 159 დაავადებულის მდგომარეობა მსუბუქია და მათ შორის მხოლოდ ხუთი ადამიანის ჰოსპიტალიზაცია გახდა საჭირო.

„დღევანდელი მდგომარეობით, წინა კვირის შესაბამის დღეებთან მიმართებით, ეპიდსიტუაცია უფრო და უფრო, თანდათანობით იძაბება და რთულდება.

თუ ჩვენ ნოემბრის შუა რიცხვებიდან გვქონდა ყოველდღიური ახალი შემთხვევების ე.წ. დაღმავალი ტალღა და ეს სტაბილურად, რამდენიმე კვირის განმავლობაში გრძელდებოდა, ბოლო ერთი კვირაა, აღინიშნება ყოველდღიური შემთხვევების მატება და სხვა ინდიკატორების ზრდა, როგორიცაა დადებითობის მაჩვენებელი.

სამი პროცენტით არის გაზრდილი დადებითობა.

გაზრდილია შვიდი დღის საშუალო დადებითობაც.

ერჯერობით ეს არ შეტყობია ბოლო ორი კვირის დადებითობის საშუალოს.

გუშინ ვთვლიდით, რომ შემთხვევების მატება შეიძლება, ყოფილიყო ე.წ. სამშაბათის სინდრომი, ანუ საახალწლო დასვენებებისა და შაბათ-კვირის დაგროვილი შემთხვევები, მაგრამ რადგან დღესაც მატება გვაქვს, ვთვლით, რომ სამწუხაროდ, დაიწყო ახალი შემთხვევების ზრდა და ამას შეიძლება, ორი მიზეზი ჰქონდეს:

ქვეყანაში იზრდება „ომიკრონის“ გავრცელება და მეორე – ის, რომ წინასაახალწლო პერიოდში ქვეყანაში გვაქვს სერიოზულად გაზრდილი მობილობა.

სამწუხაროდ, კვლავ მაღალი რჩება ყველაზე მძიმე, სიკვდილიანობის ინდიკატორი“, – განაცხადა ამირან გამყრელიძემ.

გამყრელიძე მოსახლეობას ვაცქინაციისკენ მოუწოდებს და ასევე აღნიშნავს, რომ მართალია, პირბადის ტარების მაჩვენებელი 37 პროცენტია, თუმცა არც ესაა საკმარისი და ეს მონაცემი 95 პროცენტამდე უნდა ავიდეს.

სხვა სიახლეები:

📍"ჩვენი მხარდაჭერა ამ ინიციატივას არ ექნება, რადგან ყველა საგამოძიებო კომისია, რომელიც მანამდე იქნა დაინიცირებული, ჩავარდა მათი პარლამენტში არ გამოცხადებით" - ლევან იოსელიანი ენმ-ს ინიციატივაზე

📍საქართველო თუ ფეხზე დგას, იმ ემიგრანტების დამსახურებაა, რომლებიც თვითონ ყინვაში დგანან, რომლებიც თვითონ ნახევრად შიმშილობენ და აქ ოჯახების გადარჩენაზე ზრუნავენ - მამა პეტრე