დღეს ზვიად გამსახურდია 83 წლის გახდებოდა

დღეს საქართველოს პირველი პრეზიდენტის, ზვიად გამსახურდიას დაბადების დღიდან 83, ხოლო 1991 წლის საერთო სახალხო რეფერენდუმიდან, 31 წელი შესრულდა.

სამოქალაქო დაპირისპირების შედეგად, 1992 წლის იანვარში, ზვიად გამსახურდია, საქართველოს პრეზიდენტის თანამდებობიდან გადააყენეს.

დევნილობაში ცხოვრებიდან ერთი წლის შემდეგ, ჩეჩნეთიდან დაბრუნებული გამსახურდია, 1993 წლის 31 დეკემბერს სამეგრელოს რეგიონის სოფელ ძველ ხიბულაში, დღემდე დაუდგენელ ვითარებაში დაიღუპა.

საქართველოს პირველი პრეზიდენტის დაბადების დღეს და რეფერენდუმის 31-ე წლისთავს საქართველოს პრემიერი ირაკლი ღარიბაშვილი გამოეხმაურა:

"ამ გამარჯვებისთვის უამრავი ადამიანი იბრძოდა, თუმცა უდავოა, რომ იგი პირველ რიგში საქართველოს პირველი პრეზიდენტის, ნამდვილი სახალხო ლიდერის, ზვიად გამსახურდიას დამსახურებაა.

დღეს მას 83 წელი შეუსრულდებოდა",- აღნიშნავს პრემიერი.

ქვეყნის პირველი პრეზიდენტის ბურუსით მოცული გარდაცვალების საქმის გამოძიება 1993 წელს დაიწყო და დღემდე უშედეგოდ გრძელდება.

2015 წელს საქმეს განზრახ მკვლელობის კვალიფიკაცია მიენიჭა.

მტკიცებეულებების დიდი ნაწილი აღარ არსებობს, თუმცა საქმეში დევს რამდენიმე მთავარი მოწმის ჩვენებები, რომლებიც 1993 წლის 31 დეკემბერს სოფელ ძველ ხიბულაში, მაშინდელ პრეზიდენტთან ერთად იმყოფებოდნენ.

მათ შორის არიან დაცვის წევრებიც.

პროკურატურას რეზონანსული საქმის გამოსაძიებლად და ზვიად გამსახურდიას გარდაცვალების გარემოებების დასადგენად ვადა 2024 წლამდე აქვს.

ამავე თემაზე:

📍პრემიერი: 31 მარტის რეფერენდუმმა მყარი საფუძველი ჩაუყარა თანამედროვე ქართული სახელმწიფოს მშენებლობას