გერმანია ევროკომისიას მოუწოდებს, მიიღოს ზომები ევროკავშირის საზღვრების დასაცავად

გერმანიის საგარეო საქმეთა მინისტრმა იოჰან ვადეფულმა ევროკომისიას მოუწოდა, ესპანეთის ანკლავ სეუტაში არსებული მიგრაციული კრიზისის ფონზე, მიიღოს ზომები ევროკავშირის გარე საზღვრების დასაცავად. ამის შესახებ მან Bild-თან ინტერვიუში განაცხადა.

გერმანიის საგარეო საქმეთა მინისტრმა სეუტას კრიზისს „გამძლეობის აბსოლუტური გამოცდა“ უწოდა და ევროკომისიას მსგავსი სიტუაციების თავიდან ასაცილებლად ზომების მიღებისკენ მოუწოდა.

„ბოლო დღეებში სეუტაში შექმნილი სიტუაცია ჩვენი მდგრადობის ნამდვილი გამოცდა იყო, რომელსაც გავუძელით. ამიტომ მოველი, რომ ევროკომისია გარე საზღვრების დაცვას აბსოლუტურ პრიორიტეტად აქცევს, რათა საფრთხე აღარ შეექმნას ევროკავშირის ღია შიდა საზღვრების შენგენის სისტემას“, - აღნიშნა ვადეფულმა.

მინისტრის თქმით, ეს კრიზისი ასევე აჩვენებს, თუ რამდენად მნიშვნელოვანია „ერთობლივად და სწრაფად ვებრძოლოთ დეზინფორმაციას, რომელიც ადამიანის სიცოცხლეს საფრთხეს უქმნის“.

ვადეფულმა ასევე ხაზი გაუსვა, რომ ეფექტური მიგრაციული პოლიტიკა ვერ იფუნქციონირებს მესამე ქვეყნების დახმარების გარეშე. ის მიესალმა ესპანეთისა და მაროკოს თანამშრომლობას სეუტაში არსებული კრიზისის მოგვარებაში.

„არალეგალური მიგრაციის კონტროლისთვის ჩვენ გვჭირდება პარტნიორები ევროპის გარეთ, როგორიცაა ამ შემთხვევაში მაროკო“, - განაცხადა გერმანელმა მინისტრმა.