გიორგი ვოლსკი: უპირველეს ყოვლისა, უკვე აშკარა გახდა, რომ პროქსი ომში საქართველოს ჩართულობის თემა არათუ მოიხსნა დღის წესრიგიდან, პირიქით, უფრო გამწვავდა და უფრო სერიოზული ფორმები მიიღო

უპირველეს ყოვლისა, უკვე აშკარა გახდა, რომ ამ პროქსი ომში საქართველოს ჩართულობის თემა არათუ მოიხსნა დღის წესრიგიდან, პირიქით, უფრო გამწვავდა და უფრო სერიოზული ფორმები მიიღო, - განაცხადა გადაცემაში „დღის ქრონიკა“ საქართველოს პარლამენტის თავმჯდომარის პირველმა მოადგილე გიორგი ვოლსკიმ ვიზალიბერალიზაციაზე საუბრისას.

კერძოდ, ბრიუსელში ვიზალიბერალიზაციის საკითხზე საქართველოს წარმომადგენლებთან ტექნიკური ხასიათის შეხვედრა იმართება. ქართული მხარე ბრიუსელში კონკრეტული არგუმენტებით ჩავიდა და ხაზგასმით თქვა, რომ საქართველო ვიზალიბერალიზაციით ნაკისრ ყველა ვალდებულებას ასრულებს.

ვოლსკის თქმით, ხალხს გაუბრაზდნენ რატომ გვარამია არ აირჩიეთო.

„ევროკავშირში, სადაც მსჯელობენ, ალაგებენ, გინდ „დიფ სთეითი დაარქვი“, თუ გინდა„ომის პარტია“ დაარქვი, რასაკვირველია ასე უბრალოდ არ იღებენ ამ გადაწყვეტილებას. ხალხს გაუბრაზდნენ რატომ გვარამია არ აირჩიეთო. სიტყვაზე მოვიტანე ეს გვარი იმიტომ, რომ აქტიურია ბოლო პერიოდში, რატომ გვარამია არ აირჩიე და რატომ აირჩიე „ქართული ოცნება“. დაახლოებით ასეთი სიტუაციაა.

ამისათვის, რათა ეს ნაბიჯი გადაიდგას, ჩამოაყალიბეს გარკვეული მოთხოვნები, რომელიც საკმაოდ ძნელად მისაღებია საზოგადოების დიდი ნაწილისთვის. ეტყობა არ აქვთ სრული ინფორმაცია რას განვიცდით, ან რას ვუყურებთ. უპირველეს ყოვლისა, უკვე აშკარა გახდა, რომ ამ პროქსი ომში საქართველოს ჩართულობის თემა არათუ მოიხსნა დღის წესრიგიდან, პირიქით, უფრო გამწვავდა და უფრო სერიოზული ფორმები მიიღო. შენ თუ გინდა არ დაგსაჯო, უკან უნდა გაიწვიო კანონი გამჭვირვალობასთან დაკავშირებით“, - აღნიშნა მან.

გიორგი ვოლსკის თქმითვე, კიდევ ერთი საკითხი ლგბტ თემას უკავშირდება.

„წარმოდგენა არ აქვთ რა წერია კანონში. არავითარი დისკრიმინაცია არ ხდება. ჩვენ გვაქვს ანტიდისკრიმინაციული კანონი, რომელიც ყველა უმცირესობას იცავს“, - განაცხადა მან.