ირაკლი ზარქუა: თავიანთ ამომრჩევლებს აგიჟებენ, ერთმანეთს ატყუებენ, კოლექტიურ „ნაცმოძრაობაში“ ატარონ რევოლუციები და ქვეყანას თავი დაანებონ

„კოლექტიურ „ნაცმოძრაობაში“ ატარონ რევოლუციები და ქვეყანას თავი დაანებონ“, - ამის შესახებ მმართველი გუნდის დეპუტატმა ირაკლი ზარქუამ განაცხადა.

მისი თქმით, „ნაციონალებსა“ და ყოფილ „ნაციონალებს“ შორის ახლა პირველობისთვის მიმდინარეობს ბრძოლა.

„ჩერგო რამის დამთმობია? გამორიცხულია. ის ბელადი იქიდან რამის დამთმობია?! ახალ ვარცხნილობასთან ერთად, „პრიჩოსკა“ აქვს, სიახლე შემოიტანა პოლიტიკაში, რამის დამთმობია? იქიდან დირიჟორობს.

რევოლუციური გადაწყვეტილება შემოიტანა – ნანუკა შემოჰყავს პოლიტიკაში. აქამდე რა, არ იყო ნანუკა? იყო, მაგრამ ახლა მორიგი სიგიჟე უნდა. თავიანთ ამომრჩევლებს აგიჟებენ, ახალი სისხლიო.

ვინ არის ახალი? ქალი დღე და ღამე მმართველი პარტიის ლანძღვაშია და „ნაცმოძრაობის“ გვერდით მიშას პლაკატებით დარბის. ახალი კადრია? არა. ერთმანეთს ატყუებენ. თან უნდათ, იმ ე.წ. ალიანსში პირველობა აიღონ და აჯაფსანდალია. სიმართლე გითხრათ, ისინი არც მაინტერესებს, ვხალისობთ ხოლმე.

კოლექტიურ „ნაცმოძრაობაში“ ატარონ რევოლუციები და ქვეყანას თავი დაანებონ. კოლექტიურ „ნაცმოძრაობაში“ მშვენიერი პროცესი მიმდინარეობს. ბელადი იქით თუხთუხებს, აქეთ ახალი სახეები, „ტოპ ტვინები“ მოჰყავთ“, - აღნიშნა ზარქუამ.