ირაკლი კირცხალია: ამ კვირას მივიღებთ 2026 წლის ბიუჯეტს, რომელიც შეადგენს 36, 3 მილიარდ ლარს, რაც არის უპრეცედენტო რიცხვი და ეს არის კიდევ ერთი გამოვლენა იმ პოლიტიკისა, რომელსაც აწარმოებს ჩვენი გუნდი, „ქართული ოცნება“

ამ კვირას მივიღებთ 2026 წლის ბიუჯეტს, რომელიც შეადგენს 36, 3 მილიარდ ლარს, რაც არის უპრეცედენტო რიცხვი, - ამის შესახებ საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ ირაკლი კირცხალიამ საპარლამენტო უმრავლესობის სხდომის შემდეგ გამართულ ბრიფინგზე განაცხადა.

მისი თქმით, ზრდა არის თითქმის ყველა სტრატეგიულ მიმართულებაზე.

„დღეს, ტრადიციულად, სასესიო კვირის ორშაბათს, გაიმართა უმრავლესობის სხდომა. სხდომის ფარგლებში გავიარეთ მიმდინარე საკანონმდებლო ცვლილებები, რომელიც დაინიცირდა და გავა უკვე პლენარულ სხდომაზე. მინდა რამდენიმე მთავარ და ძალიან მნიშვნელოვან საკითხს გამოვეხმაურო, რომელზეც დღეს იყო საუბარი უმრავლესობის ფორმატში. პირველი, ეს არის ბიუჯეტი. ამ კვირას მივიღებთ 2026 წლის ბიუჯეტს, რომელიც შეადგენს 36, 3 მილიარდ ლარს, რაც არის უპრეცედენტო რიცხვი.

ზრდა არის თითქმის ყველა სტრატეგიულ მიმართულებაზე. გამოვყოფდი სოციალურ და ჯანდაცვის მიმართულებას, სადაც 848 მილიონი ლარით იზრდება ბიუჯეტი და შეადგენს 9,6 მილიარდზე მეტს, ეს არის ძალიან მნიშვნელოვანი და ეს არის ჩვენი გუნდისთვის ძალიან მნიშვნელოვანი იმიტომ, რომ იცით, 2012 წლიდან ჩვენი მიდგომები ზოგადად, სოციალურ მიმართულებასთან და ჯანდაცვასთან მიმართებით. ეს იყო ძირითადად განსახილველი თემა. ერთ-ერთი მთავარი, ბიუჯეტი, რომელსაც კიდევ ერთხელ ხაზგასმით ვიმეორებ, რომ ამ კვირაში მივიღებთ, დავამტკიცებთ.

ეს არის კიდევ ერთი გამოვლენა და გამოხატულება იმ პოლიტიკისა, რომელსაც აწარმოებს ჩვენი გუნდი, „ქართული ოცნება“. ის ეკონომიკური ზრდა არის სწორედ იმ სამშვიდობო პოლიტიკის კონვერტაცია ციფრებში და ეკონომიკურ კეთილდღეობაში, რასაც ჩვენ წლიდან წლამდე ვხედავთ“, - აღნიშნა ირაკლი კირცხალიამ.