ირაკლი კირცხალია უვიზო მიმოსვლის შესაძლო შეჩერებაზე: როგორც ჩვენი საზოგადოება არ ექცევა შანტაჟის ქვეშ, ისე არ ექცევა ჩვენი გუნდი - ეს არის მათი შანტაჟის ბოლო ტყვია, რომლის გასროლის არანაირი საფუძველი არ არსებობს

თითოეული ჩვენი მიღწევა უნდათ აქციონ შანტაჟის იარაღად, დარჩათ შანტაჟის ბოლო ტყვია, რომელიც შეუძლიათ, გაისროლონ საქართველოს წინააღმდეგ, თუმცა ამის არც მორალური, არც სამართლებრივი და არც პოლიტიკური საფუძველი არ არსებობს, - განაცხადა საპარლამენტო უმრავლესობის ლიდერმა, ირაკლი კირცხალიამ უვიზო მიმოსვლის შესაძლო შეჩერებასთან დაკავშირებული კითხვის საპასუხოდ.

ირაკლი კირცხალიამ აღნიშნა, საქართველოს მოსახლეობა შანტაჟს არ ექვემდებარება.

„რომელ ადამიანებზე ვსაუბრობთ, რომლებიც დღიდან ჩვენი ქვეყნის მიერ წინ გადადგმული ნაბიჯებისა, დარბოდნენ ბრიუსელში თავიანთ პატრონებთან, როგორმე ჩვენს ქვეყანას არ მიეღწია რაიმე წარმატებისთვის, ჩვენი მოქალაქეებისთვის არ ყოფილიყო ბენეფიტები, რატომ? ერთი კონკრეტული მიზნის გამო – ქვა ქვაზე ნუ დარჩენილა ამ ქვეყანაში, მათთვის არაფერს ნიშნავს ჩვენი საზოგადოება, სამშობლო, მათთვის მთავარია მათი აგენტურული ინტერესები.

დღესაც აგრძელებენ ამას, ამბობენ, ჩვენ არ ვითხოვთ ჩვენი მოსახლეობის სანქცირებას, დასჯას, თუმცა დაუწესეთ სანქციები „ქართული ოცნების“ წევრებსო. ძალიან კარგად იციან, არავის ეშინია ამ სანქციების. როგორც ჩვენი საზოგადოება არ ექცევა შანტაჟის ქვეშ, ისე არ ექცევა ჩვენი გუნდი. ეს არის მათი შანტაჟის ბოლო ტყვია, რომლის გასროლის არანაირი საფუძველი არ არსებობს“, - აღნიშნა ირაკლი კირცხალიამ.