ირაკლი ქადაგიშვილი: შეიძლება ითქვას, რომ გამოწვევები, რომლებიც ევროპას მრავლად აქვს, დღეს უკვე კრიზისშია გადასული

„შეიძლება ითქვას, რომ გამოწვევები, რომლებიც ევროპას მრავლად აქვს, დღეს უკვე კრიზისშია გადასული“, - განაცხადა გადაცემაში „დღის ქრონიკა“, რეგიონული პოლიტიკისა და თვითმმართველობის საპარლამენტო კომიტეტის თავმჯდომარემ ირაკლი ქადაგიშვილმა საფრანგეთში განვითარებულ მოვლენებთან დაკავშირებით.

ქადაგიშვილის თქმით, ეს პროცესი ნათლად აჩვენებს იმას, რომ არსებული პოლიტიკური ელიტებიც არანაირ ნდობას აღარ იმსახურებენ მოსახლეობაში.

„ფაქტი სახეზეა, რომ კრიზისი უკვე ქუჩებშია გადმოსული და ყველას თვალწინ ხდება იმ პროცესების წარმართვა, რაც აქამდე შედარებით დამალული იყო და მხოლოდ საქმეში ჩახედული ან დაინტერესებული ადამიანისთვის თუ საზოგადოებისთვის იყო ცნობილი. ანუ, შეიძლება ითქვას, რომ გამოწვევები, რომლებიც ევროპას მრავლად აქვს, დღეს უკვე კრიზისშია გადასული. ეს, რა თქმა უნდა, არის პირველ რიგში, იდეოლოგიური ხასიათის გამოწვევები. ეს არის ეკონომიკური ხასიათის გამოწვევები და სოციალური პრობლემატიკა. ბუნებრივია, როდესაც არის იდეოლოგიური, ეკონომიკური პრობლემები, იქ უკვე სოციალური საკითხები უფრო და უფრო წინა პლანზე გამოდის, მწვავდება. ეს ის ბუკეტია, რაც საბოლოო ჯამში ასეთი მასშტაბური კრიზისის სახით, ასეთ მასშტაბურ ქუჩის აქციებსა და ბრუტალურ ქუჩის აქციებში გადაიზარდა. ეს პროცესი კიდევ ნათლად აჩვენებს იმას, რომ არსებული პოლიტიკური ელიტებიც არანაირ ნდობას აღარ იმსახურებენ მოსახლეობაში, მათი სანდოობა ძალიან დაბალია“, - აღნიშნა მან.