კვორუმის არარსებობის გამო საქართველოს პარლამენტის ბიუროს დღევანდელი სხდომა ჩაიშალა

კვორუმის არარსებობის გამო საქართველოს პარლამენტის ბიუროს დღევანდელი სხდომა ჩაიშალა. 

„ბიურო უმრავლესობის მხრიდან შეგნებულად ჩაიშალა, რისი მიზეზიც იყო ოპოზიციის მიერ სახელმწიფო ინსპექტორის სამსახურთან დაკავშირებით ალტერნატიული კანონპროექტის წარდგენა“, - უთხრა ჟურნალისტებს  ფრაქცია „ქართული ოცნების“ თავმჯდომარემ მამუკა მდინარაძემ. 

„ჩვენმა პატივცემულმა ოპონენტებმა გადაწყვიტეს, პროცედურული მექანიზმების გამოყენებით მაქსიმალურად გაეწელათ დრო. ჩვენც ამას დავუპირისპირეთ ის, რომ არ მოვახდინეთ ბიუროს სხდომისთვის რაიმე განსაკუთრებული მოქმედება და შეიძლება ითქვას, შეგნებულადაც ბიუროს სხდომა ჩავარდა კვორუმის არარსებობის გამო“, - განაცხადა მდინარაძემ.

მდინარაძე ამბობს: „საზოგადოებას ვერ მოვატყუებთ, რომ ვცადეთ და ბიურო ვერ ჩავატარეთ, პირიქით, ჩვენი მხრიდან ასეთი მცდელობა არ ყოფილა. რამდენიმე დეპუტატი ინსტიტუტის პატივისცემის ნიშნად გამოვცხადდით, მაგრამ ბიურო შეგნებულად არ ჩატარდა. ეს იყო ჩვენი მხრიდან პოლიტიკური სვლა ოპოზიციის საპასუხოდ, რომელმაც გადაწყვიტა, დროის გაწელვის გზით, პროცედურული გზით, რაღაცნაირად შემაფერხებელი ნაბიჯები გადაედგა ჩვენ მიერ ინიცირებულ კანონპროექტზე“.

მისი თქმით, რაც უნდა გასაკვირი იყოს, ოპოზიციის მიერ ალტერნატივის სახით წარმოდგენილი კანონპროექტი არის ინსპექტორის მიერ წარმოდგენილი კანონპროექტის ანალოგი. სიტყვასიტყვით იგივეა. ოპოზიციას თავისი კანონპროექტი კი არ წარმოუდგენია, ინსპექტორის კანონპროექტი წარმოადგინა. ოპოზიციას შეეძლო, თუნდაც, პროცედურული ომისთვის და დროის გაწელვისთვის საკუთარი ალტერნატიული კანონპროექტი წარმოედგინა, თუმცა სუსტი პროექტი წარმოადგინა. ოპოზიციას სურდა, პროცედურული ომი, მაგრამ კოვზი ნაცარში ჩაუვარდა.

პარლამენტის ბიუროს დღევანდელ სხდომაზე, სახელმწიფო ინსპექტორის სამსახურთან დაკავშირებით ფრაქცია "ლელო-პარტნიორობა საქართველოსთვის" ალტერნატიული საკანონმდებლო პროექტი უნდა დარეგისტრირებულიყო.

ასევე საინტერესოა:

🔵 მძიმე პოლარიზაციის პირობებში, ყველა მსგავსი გადაწყვეტილების მიღება საზოგადოებაში იწვევს ბუნდოვანებას და კითხვებს - საქართველოს პრეზიდენტის განცხადება

🔵 "რატომღაც ჩაითვალა, რომ რამდენიმე დღის ბავშვით ხელში, ვერ შევძლებდი სამსახურის ინტერესის დაცვას" - ლონდა თოლორაია (ვიდეო)

🔵 ნინო ლომჯარია: სახელმწიფო ინსპექტორის სამსახურის გაუქმების გადაწყვეტილება წინააღმდეგობაში მოდის კონსტიტუციასთან, ადამიანის უფლებებთან და არის დისკრიმინაციული

🔵 აშშ-ის ელჩი მოუწოდებს პარლამენტს, რომ „ოცნების“ მიერ ინიცირებული კანონპროექტი დაჩქარებული წესით არ განიხილოს და პროცესი ინკლუზიური და გამჭვირვალე გახადოს