ლევან მაჭავარიანი BBC-ის ფილმზე: დაველოდოთ, მორიგ ჯერზე რას შემოგვთავაზებენ რადიკალები. სავარაუდოდ, მათი მომდევნო მესიჯი იქნება, რომ თითქოს, ურანის გამდიდრებით არის ჩვენი ხელისუფლება დაკავებული

სუსის გამოძიებითაც დადასტურდა ის, თუ რა აბსურდის თეატრი შემოგვთავაზეს ჩვენმა რადიკალებმა და ამ შემთხვევაში BBC ჰყავდათ ამ ყველაფერში ჩართული, - განუცხადა „ქრონიკას“ საპარლამენტო ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა.

მისივე თქმით, გულდასაწყვეტია, რომ ერთ დროს რეპუტაციის მქონე ტელემაუწყებლობა ასეთი სიცრუის ტირაჟირებას ახდენს.

„ძალიან გულდასაწყვეტია, რომ ერთ დროს ასეთი რეპუტაციის მქონე ტელემაუწყებლობა ასეთი სიცრუის ტირაჟირებას ახდენს ყოველგვარი ფაქტების, მტკიცებულებების გარეშე. თუმცა, გასაკვირი არ არის, იქიდან გამომდინარე, რომ შვეიცარიის ერთ-ერთმა ავტორიტეტულმა ბანკმაც კი შესწირა თავისი რეპუტაცია, საქართველოში რომ ზეწოლა განეხორციელებინათ - კონკრეტულად, ბატონ ბიძინა ივანიშვილზე. რა თქმა უნდა, ასეთი ზღაპრების ჩვენს მოქალაქეებს არ სჯერათ და გამოძიების გარეშეც ჩვენი მოსახლეობის აბსოლუტური უმრავლესობა დარწმუნებული იყო იმაში, რომ ეს არის ჩვეულებრივად სიცრუე. დაველოდოთ, მორიგ ჯერზე რას შემოგვთავაზებენ რადიკალები. სავარაუდოდ, მათი მომდევნო მესიჯი იქნება, რომ თითქოს, რაღაც ურანის გამდიდრებით არის ჩვენი ხელისუფლება დაკავებული“, - აღნიშნა მაჭავარიანმა.

დღეს, სუს-ში გამართულ ბრიფინგზე განაცხადეს, რომ 2024 წლის 4-5 დეკემბრის ღამით, მასების მართვისათვის გამოყენებული იყო „ქლორობენზილიდინ მალონონიტრილი“, გამხსნელად გამოიყენეს „პროპილენ გლიკოლის“ ხსნარი - არცერთი არ განეკუთვნება აკრძალულ ნივთიერებათა კატეგორიას. სუს-ში ასევე აცხადებენ, რომ „ბრომობენზილ ციანიდი“, იგივე „კამიტი“ საქართველოს შინაგან საქმეთა სამინისტროს არასოდეს შეუძენია.

BBC-მ გამოაქვეყნა სტატია, რომელშიც საუბარია იმაზე, რომ „ქართული ოცნების“ ხელისუფლებამ აქციაზე პირველი მსოფლიო ომის დროინდელი ქიმიური იარაღი გამოიყენა. „ქართული ოცნება“ BBC-ის წინააღმდეგ საერთაშორისო სასამართლოებში სამართლებრივ დავას იწყებს. ამასთან, სახელმწიფო უსაფრთხოების სამსახურმა BBC-ის მიერ საჯარო სივრცეში დანაშაულის შესახებ გავრცელებულ ინფორმაციასთან დაკავშირებით გამოძიება დაიწყო.