ლევან მაჭავარიანი: კვლევა, რა თქმა უნდა, მიუთითებს იმ პრობლემებზე, რა პრობლემებიც არის ევროკავშირის მმართველ კლასში, ჩვენ ამაზე ძალიან ბევრს ვსაუბრობთ ბოლო 4 წლის განმავლობაში

„კვლევა, რა თქმა უნდა, მიუთითებს იმ პრობლემებზე, რა პრობლემებიც არის ევროკავშირის მმართველ კლასში. ჩვენ ამაზე ძალიან ბევრს ვსაუბრობთ ბოლო 4 წლის განმავლობაში. ამ შემთხვევაში, ეს კვლევაც ადასტურებს იმას, რაზეც „ქართული ოცნება“ საუბრობს“, - ამის შესახებ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა განაცხადა, რითაც ის „პოლიტიკოს“ სტატიას გამოეხმაურა, სადაც ნათქვამია, რომ „ევროპელთა უმეტესობა მომავალს პესიმისტურად უყურებს“.

როგორც დეპუტატი აღნიშნავს, ევროკავშირის წარმომადგენლები ერთმანეთს აბრალებენ იმ რთულ მდგომარეობას, რა მდგომარეობაშიც აღმოჩნდნენ.

„ცოტა ხნის წინ გამოქვეყნდა არანაკლებ ავტორიტეტული ორგანიზაციის Ipsos-ის კვლევა, სადაც ანალოგიური იყო, ძალიან ნიჰილისტური განწყობაა ევროპელ ხალხში. ისინი მიიჩნევენ, რომ დემოკრატიის უკუსვლაა ევროკავშირში, ცხოვრების დონის გაუარესება და ძალიან პესიმისტური მოლოდინი აქვთ და ამ ყველაფერს ისიც ადასტურებს, რაც ამერიკის შეერთებული შტატების ადმინისტრაციამ ასახა თავის უსაფრთხოების დოკუმენტში, სადაც ფაქტობრივად, ერთი ერთში არის განმეორებული ის პრეტენზიები, რა პრეტენზიებიც „ქართულ ოცნებას“ აქვს ევრობიუროკრატების მიმართ.

მთავარი მიზეზი არის, რა თქმა უნდა, მმართველი კლასი. ამ შემთხვევაში არა მხოლოდ ჩვენ, არა მხოლოდ კვლევები, არა მხოლოდ ამერიკის შეერთებული შტატების საუბრობს რიგი ევრობიუროკრატების, რომლებიც სათავეში უდგანან ევროკავშირს, სისუსტეებზე, არამედ უშუალოდ, ევროკავშირში არის უკვე სერიოზული დაპირისპირება. მაგალითად, ქალბატონი კალასის წინააღმდეგ უკვე ღიად გამოდის ბუნდესტაგის საგარეო კომიტეტის თავმჯდომარე, ღიად უპირისპირდება მას ევროპარლამენტის ვიცე-პრეზიდენტი, ამბობენ, რომ მის ხელში ევროპას მომავალი არ აქვს.

ასევე, ქალბატონი ურსულა ფონ დენ ლაიენის მმართველობითაც თვითონ ევროპაში არიან უკმაყოფილოები და გადასული არიან ახლა ერთმანეთისკენ თითის გაშვერაზე და ერთმანეთს აბრალებენ იმ რთულ მდგომარეობას, რა მდგომარეობაშიც აღმოჩნდა ევროკავშირი მათი მმართველობის პირობებში“, - აღნიშნავს მმართველი გუნდის დეპუტატი.