ლევან მაჭავარიანი: თუ ჰგონიათ, რომ ვიღაც ევროპარლამენტარის, ან ევრობიუროკრატის ნათქვამს ქართველი აპრიორი დაიჯერებს, დროა, გადახედონ იმ წყაროებს, საიდანაც იღებენ ინფორმაციას

საპარლამენტო ფრაქცია „ქართული ოცნების“ თავმჯდომარის პირველი მოადგილე ლევან მაჭავარიანი „დღის ქრონიკაში“ შალვა პაპუაშვილის განცხადებაზე ALDE-ს პასუხს გამოეხმაურა.

წამყვანმა ჰკითხა, რაზე მეტყველებს ALDE-ს მტკიცებით ფორმაში გაკეთებული განცხადება იმასთან დაკავშირებით, რომ გმობს ხელისუფლების ქმედებას, როდესაც მან აქციის მონაწილეების მიმართ ქიმიური იარაღი გამოიყენა.

„[ALDE] არ გამიჯვნიან [ელისაშვილის ქმედებას] და ლამაზი სიტყვებით შემოიფარგლნენ. რა შუაშია, რომ აბამენ რაღაც ზღაპარს?! მტკიცებით ფორმაში ვინ მისცათ საუბრის უფლება ქიმიურ იარაღზე?! გამოძიება დასრულებულია და ყველაფერს პასუხი გაეცა. ნებისმიერი შეგნებული ადამიანი ხვდება, რომ ჩვეულებრივი დეზინფორმაცია იყო. ბატონი პრემიერის ინიციატივაა, რომ ნებისმიერ დაინტერესებულ საერთაშორისო აქტორს ნებისმიერი მასალა მივაწოდოთ, რაც გამოძიებაში დევს თავისი ნივთმტკიცებულებებით.

ALDE აგრძელებს იმას, რაც გრძელდება ბოლო ოთხი წლის განმავლობაში და ჩვენმა მოქალაქეებმა ძალიან კარგად გაარჩიეს უკვე თეთრი და შავი. თუ ჰგონიათ, რომ ვიღაც ევროპარლამენტარის, ან ევრობიუროკრატის ნათქვამს ქართველი აპრიორი დაიჯერებს, დროა, გადახედონ იმ წყაროებს, საიდანაც იღებენ ინფორმაციას. ესენი არიან მდიდარი „ენჯეოები“, რომლებიც ლამაზად აწვდიან აქედან ინფორმაციას, ვინაიდან არ სურთ, რომ აჩვენონ, როგორი გამარგინალურები არიან და არ შეუჩერდეთ დაფინანსება“, - აღნიშნა მაჭავარიანმა.