ლევან მახაშვილი აქციების დაფინანსებასთან დაკავშირებით აქტივისტის აღიარებაზე: საბოლოო ჯამში, თავადვე აღიარებენ ხოლმე თუ რას წარმოადგენენ, ვის წარმოადგენენ და რა არის მათი რეალური ინტერესები

საბოლოო ჯამში, თავდვე აღიარებენ ხოლმე თუ რას წარმოადგენენ, ვის წარმოადგენენ და რა არის მათი რეალური ინტერესები, - განაცხადა ევროინტეგრაციის კომიტეტის თავმჯდომარე ლევან მახაშვილმა, ოპოზიციის აქტივისტის აღიარებასთან დაკავშირებით, რომ რადიკალურ აქციებს „პატრიოტთა ალიანსი“ აფინანსებს.

მისი თქმით, მიუხედავად იმისა, რომ ცდილობენ შექმნან ილუზია თითქოს სხვადასხვა ძალას წარმოადგენენ, საბოლოოდ დადასტურდება ხოლმე, რომ ყველა ერთად კოლექტიური „ნაცმოძრაობაა“.

„ეს არის მათი ე.წ. გულწრფელი პროტესტი, რამდენიც არ უნდა მოატყუონ საზოგადოება, სინამდვილეში, მერე თავადვე აღიარებენ ხოლმე, რომ რეალურად ამ პროცესის უკან არის ჩვეულებრივი ვიწრო პოლიტიკური ინტერესები. რაც მთავარია, შეიძლება ცდილობენ მოსახლეობას დაანახონ, რომ სხვადასხვა ძალა, სხვადასხვა მიმართულებას თუ აზრს წარმოადგენენ მაგრამ სინამდვილეში ერთიან ქვაბში იხარშება ყველა - ე.წ. კოლექტიური „ნაციონალური მოძრაობის“ სახით, საბოლოო ჯამში თავადვე აღიარებენ ხოლმე თუ რას წარმოადგენენ, ვის წარმოადგენენ და რა არის მათი რეალური ინტერესები“, - განაცხადა ლევან მახაშვილმა.

ცნობისთვის, ოპოზიციის აქტივისტი მარიამ მეყანწიშვილი აცხადებს, რომ მიმდინარე აქციებს „პატრიოტთა ალიანსის“ ლიდერები აფინანსებენ.

კერძოდ, მეყანწიშვილი ვიდეოში აცხადებს, რომ მამუკა ტოროშელიძეს აქციისთვის დინამიკები სწორედ ირმა ინაშვილმა გადასცა. ამასთან, დავით თარხან-მოურავმა გარკვეული თანხა გადასცა დინამიკების და პიკაპის დასაქირავებლად.