მახაშვილი: მოლდოვისგან გასაკვირი არაფერია, ბოლო წლებში ვნახეთ, მოლდოვის პრეზიდენტმა როგორ მოასუფთავა მედიასივრცე და დატოვა მხოლოდ ის ერთი-ორი არხი, რომლებიც პირდაპირ სამთავრობო პროპაგანდაა

ეს არის გაგრძელება იმ ძალისხმევის, რასაც ჩვენ ვაკვირდებით ბოლო პერიოდის განმავლობაში, რომ მათთვის არასასურველი ხმები გააჩუმონ, - განაცხადა პარლამენტის ევროპასთან ინტეგრაციის კომიტეტის თავმჯდომარემ ლევან მახაშვილმა.

დეპუტატი გამოეხმაურა ევროპარლამენტის მიერ ტელეკომპანია „იმედისთვის“ საქმიანობის 1 წლით აკრძალვას, ასევე, მოლდოვას მიერ სამი ქართული მაუწყებლისთვის - „იმედისთვის“ , „რუსთავი 2“-სა და „პოს ტივისთვის“ აკრედიტაციაზე უარის განმარტების გარეშე თქმას. დაუსაბუთებელი გადაწყვეტილების გამო, ზემოაღნიშნული სამი არხი ვერ გააშუქებს ევროპის საბჭოს მინისტრთა კომიტეტის 135-ე სესიას, სადაც საქართველოს საგარეო უწყების ხელმძღვანელიც იქნება წარმოდგენილი.

ლევან მახაშვილის თქმით, იმისთვის, რომ თავისუფალი ხმა არ ისმოდეს, ცდილობენ, გამოიყენონ სავიზო ინსტრუმენტები, აკრედიტაციის ინსტრუმენტები და სხვადასხვა მეთოდი.

„მოლდოვისგან გასაკვირი არაფერია. ბოლო წლებში ჩვენ ვნახეთ, მოლდოვის პრეზიდენტმა როგორ მოასუფთავა მედიასივრცე და დატოვა მხოლოდ ის ერთი-ორი არხი, რომლებიც პირდაპირ არის სამთავრობო პროპაგანდა. ეს ჩვენთვის არ იყო მოულოდნელი, მაგრამ, ნებისმიერ შემთხვევაში, არის მიუღებელი მსგავსი ხისტი გადაწყვეტილებები, მით უმეტეს როდესაც საქმე ეხება ევროპის საბჭოს მსგავს მასშტაბურ ღონისძიებებს, სადაც საზოგადოების ინტერესი არის მაღალი და ყველა მედიას უნდა ჰქონდეს შესაძლებლობა, რომ საკუთარ მაყურებლამდე მიიტანოს ეს ამბები“, - აღნიშნა ლევან მახაშვილმა.