პაპუაშვილი: ზოგმა საჩუქრად მიიღო დამოუკიდებლობა - ჩვენ ამისთვის ვიბრძოლეთ და იმისთვის არ გვიბრძოლია, რომ ახლა ესტონეთის საგარეო საქმეთა მინისტრს ხონჩით ჩავაბაროთ ჩვენი სუვერენიტეტი

„არ ვაპირებთ, ანგარიში ვაბაროთ რომელიღაც ქვეყნებს ჩვენს შიდა პოლიტიკაზე. ჩვენ ვართ დამოუკიდებელი სახელმწიფო, ჩვენი მართლმსაჯულებით, ამისთვის ვიბრძოლეთ და სისხლი დავღვარეთ. ზოგმა საჩუქრად მიიღო დამოუკიდებლობა - ჩვენ ამისთვის ვიბრძოლეთ და იმისთვის არ გვიბრძოლია, რომ ახლა ესტონეთის საგარეო საქმეთა მინისტრს ხონჩით ჩავაბაროთ ჩვენი სუვერენიტეტი, მართლმსაჯულება, არჩევნები და ა.შ“, - ამის შესახებ საქართველოს პარლამენტის თავმჯდომარემ შალვა პაპუაშვილმა „ღამის კურიერის“ ეთერში განაცხადა.

„საბჭოთა მოსკოვს რომ გავურბოდით, იმას არ ვფიქრობდით, რომ ტალინის გავლენების ქვეშ უნდა ვყოფილიყავით. ყველას მოუწევს, რომ პატივი სცეს ჩვენი ქვეყნისა და ქართველი ხალხის დამოუკიდებლობას.

ჩვენ ვართ სხვადასხვა საერთაშორისო ინსტიტუტის ნაწილი და ამ მხრივ ჩვენი ანგარიშვალდებულება გვაქვს - ამისთვის არის სტრასბურგის სასამართლო. რამდენჯერ ევროკავშირმა და ევროკავშირის ელჩმა რაღაც დაგვაბრალა, ყველაფერში დამარცხდა, - გინდა სააკაშვილის საქმეზე, გინდა მელიას საქმეზე, „რუსთავი 2“-ის საქმე, სხვა საქმეები - ხომ გვაბრალეს ეს ყველაფერი, ხომ დამარცხდნენ თავადვე და ხომ არავის ბოდიში არ მოუხდია ამისთვის.

საქართველოს წინააღმდეგ უკვე რამდენი წელია ამ მავნებლობას აქვს ადგილი, ახლაც იგივე მავნებლობას ვხედავთ ამ პირველი მსოფლიო ომის შხამ-ქიმიკატებთან დაკავშირებით. ამ მავნებლობას რომ ჩადიან, მერე ხელს დაიბანენ და გაიპარებიან ხოლმე და ხმას არ იღებენ. ეს ერა დამთავრდა, როდესაც ჩვენ გული გადავუშალეთ, სული გადავუშალეთ, მეგობრობა შევფიცეთ და, საპირისპიროდ, მივიღეთ ხელების ფათური ჩვენივე ოჯახში, წესრიგის დამყარების სურვილი გარედან და გენერალ-გუბერნატორებად წარმოდგენა საქართველოსი. ჩვენ არავისთვის ანგარიშის ჩაბარებას არ ვაპირებთ შიდა საქმეებთან დაკავშირებით“, - განაცხადა შალვა პაპუაშვილმა.