საავტომობილო გზების დეპარტამენტი: მდინარე არაგვზე, ხიდზე დაზიანდა სავალი ნაწილის ფილა, დასავლეთიდან აღმოსავლეთით მოძრავ ავტოტრანსპორტს გადაადგილება ალტერნატიული მარშრუტებით შეუძლია

საერთაშორისო მნიშვნელობის თბილისი-სენაკი-ლესელიძის საავტომობილო გზის 26-ე კილომეტრზე, მდინარე არაგვზე მდებარე ხიდზე (თბილისის მიმართულებით, მარცხენა ზოლი) დაზიანდა სავალი ნაწილის ერთ-ერთი ფილა, - ამის შესახებ ინფორმაციას საავტომობილო გზების დეპარტამენტი ავრცელებს.

მათივე ცნობით, მოქალაქეთა უსაფრთხოების უზრუნველსაყოფად მოხდა დაზიანებული ფილის დაშლა, არმირების გაძლიერება და ბეტონით შევსება.

„სამუშაოების მიმდინარეობის პერიოდში დასავლეთიდან აღმოსავლეთის მიმართულებით მოძრავ ავტოტრანსპორტს გადაადგილება შეუძლია შემდეგი ალტერნატიული მარშრუტებით: ზაჰესი-მცხეთა-კავთისხევი-გორი-სკრა-ქარელი-ოსიაური და ნარეკვავი-მცხეთა-რკინიგზის სადგურის საავტომობილო გზები.

აღსანიშნავია, რომ ავტოტრანსპორტის მაღალი ინტენსივობის გამო მდინარე არაგვზე არსებული ხიდის სრული რეაბილიტაცია ვერ ხერხდება, რის გამოც პერიოდულად ტარდება აუცილებელი აღდგენითი სამუშაოები.

ამასთან, არსებული ხიდის პარალელურად უკვე მიმდინარეობს ახალი ხიდის მშენებლობა, რომლის ექსპლუატაციაში გაშვება მიმდინარე წელს არის დაგეგმილი. ახალი ინფრასტრუქტურა მნიშვნელოვნად გააუმჯობესებს მოძრაობის უსაფრთხოებასა და გამტარუნარიანობას. ბოდიშს ვუხდით მოქალაქეებს შექმნილი დროებითი დისკომფორტის გამო და მოვუწოდებთ, გაითვალისწინონ დაწესებული შეზღუდვები გადაადგილების დაგეგმვისას“, - ნათქვამია ინფორმაციაში.