საბჭოთა ოკუპაციიდან 105 წელი გავიდა

საბჭოთა ოკუპაციიდან 105 წელი გავიდა. ამ დღეს, 1921 წლის 25 თებერვალს, თბილისი მე-11 წითელმა არმიამ დაიკავა და საქართველო საბჭოთა იმპერიის ნაწილად იქცა. ხუთკვირიანი თავგანწირული ბრძოლის მიუხედავად, საქართველოს დემოკრატიული რესპუბლიკის მოქალაქეები ვერაფერს გახდნენ რუსული ძალების წინაშე და ქვეყანამ მთელი 70 წლით დაკარგა დამოუკიდებლობა.

ამას მრავალი სისხლიანი მოვლენა მოჰყვა - დაიწყო რეპრესიები, აიკრძალა ანტიბოლშევიკური პოლიტიკური პარტიები, დახვრიტეს, დააპატიმრეს, ან გადაასახლეს ათასობით ადამიანი.

1921 წლის ოკუპაციას წინ უძღოდა 1918 წლის 26 მაისს საქართველოს ეროვნული საბჭოს მიერ დამოუკიდებლობის გამოცხადება, რასაც რუსეთი ვერ ეგუებოდა და ყველანაირად ცდილობდა, საქართველო კვლავ თავის შემადგენლობაში დაებრუნებინა.

1920 წლის 7 მაისს მოსკოვში ბოლშევიკურ რუსეთსა და დამოუკიდებელ საქართველოს შორის გაფორმდა სამშვიდობო და სამოკავშირეო ხელშეკრულება, რომლითაც რუსეთი საქართველოს დამოუკიდებლობას აღიარებდა და მის საშინაო საქმეებში ჩაურევლობის ვალდებულებას იღებდა. თუმცა, ამას მისთვის ხელი არ შეუშლია, საქართველოს საზღვრები გადმოელახა და ქვეყანა დაეპყრო. ამ პროცესებს მოსკოვში უშუალოდ იოსებ სტალინი ხელმძღვანელობდა, ამიერკავკასიაში კი ამ საქმის შემსრულებელი სერგო ორჯონიკიძე გახლდათ.

26 თებერვალს, საქართველოს გასაბჭოების მეორე დღეს, ქალაქის მოსახლეობამ რუსთაველის გამზირზე ხალხმრავალი სამგლოვიარო პროცესია მოაწყო, საქართველოს მთავრობის წევრთა დიდი ნაწილი კი საზღვარგარეთ გაიხიზნა.

ქვეყანამ დამოუკიდებლობა 1991 წლის 9 აპრილს აღიდგინა.