სამების ტაძრის ეზოში ვაზი დაირგო

2022 წლის 22 მაისს, ღვთისმსახურების დასრულების შემდეგ, ყოვლად წმინდა სამების საპატრიარქო ტაძრის მიმდებარე ტერიტორიაზე საქართველოს სხვადასხვა რეგიონიდან ჩამოტანილი ვაზის რამდენიმე სახეობა და ხეხილი დაირგო.

ინფორმაციას საპატრიარქოს საზოგადოებასთან სამსახური ავრცელებს.

"მიმდინარე სამუშაოებში საქართველოს გარემოს დაცვისა და სოფლის მეურნეობის სამინისტრო,  სოფლის მეურნეობის სამეცნიერო კვლევითი ცენტრი, შპს ,,ბაკურციხის სანერგე", ,,თბილისერვის ჯგუფი", ,,ქართუ ბანკი" და საპატრიარქოს მეღვინეობა-მევენახეობის ცენტრი იყო ჩართული.

ნერგების მოვლა-პატრონობაზე საპატრიარქოს დეკორატიული მებაღეობის საზოგადოებრივი კოლეჯის პედაგოგები და მოსწავლეები იზრუნებენ.

ქართული ვაზის ჯიშებისა და ხეხილოვანი კულტურის პოპულარიზაციასა და მოვლას ძალიან დიდი მნიშვნელობა აქვს.

ამ მიმართულებით საქართველოს საპატრიარქოსა და სოფლის მეურნეობის სამინისტროს თანამშრომლობა რამდენიმე წლის წინ დაიწყო და დღესაც აქტიურად მიმდინარეობს.

ადგილობრივი ვაზის ჯიშები გაშენებულია, კვლავ ირგვება და მომავალშიც იგეგმება დარგვა საქართველოს რეგიონების მიხედვით, სხვადასხვა ეპარქიაში, მათ შორის, გურიაში, სამეგრელოში, კახეთში, სამცხე-ჯავახეთში.

ნერგების დარგვის პროცესში მონაწილეობდნენ საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი), სასულიერო პირები და გარემოს დაცვისა და სოფლის მეურნეობის სამინისტროს წარმომადგენლები", - აღნიშნულია ინფორმაციაში.
 
"ყველას გილოცავთ ნიკოლოზობის დღესასწაულს.

აღდგომის შემდეგ, მისი უწმინდესობისა და უნეტარესობის ლოცვა-კურთხევით, სამების ტაძრის მიმდებარე ტერიტორიაზე გაშენდა შესანიშნავი ხეხილის ბაღი და ჩაიყარა ვაზი.

დღეს ჩვენ კიდევ დავრგეთ ნერგები და მაქვს პატივი, რომ მისი უწმინდესობისა და უნეტარესობის, კათოლიკოს-პატრიარქ ილია II-ის სახელით, მადლობა გადავუხადო და დავლოცო ყველა ის ადამიანი, ვინც მონაწილეობდა ამ შესანიშნავ საქმეში.

ეს არის სოფლის მეურნეობის სამინისტრო და პირადად ბატონი ლევან უჯმაჯურიძე, ეს არის ქალაქის მერიის ორგანიზაცია ,,თბისლერვისი", ასევე ,,ქართუ ბანკი", აგრეთვე საპატრიარქოს მეღვინეობა-მევენახეობის ცენტრი.

მისი უწმინდესობა სადაც მიბრძანდა, ყველგან წალკოტად აქცია იქაურობა.

იგი დიდი მოყვარული გახლავთ ბუნების, სილამაზის, მშვენიერების და ჩვენც მიგვაჩვია, გვასწავლის ამ ყველაფერს და დღეს ასეთი შესანიშნავი დღეა, მისი ლოცა-კურთხევით.

ყველას დიდი მადლობა, უფლის მადლი გქონოდეთ ყველას", - ბრძანა ღონისძიების დასასრულს მიტროპოლიტმა შიომ.

ასევე დაგაინტერესებთ:

📍მამაკაცმა ოჯახი მიატოვა და იმ 22 წლის უკრაინელ ლტოლვილ გოგონასთან ერთად წავიდა, რომელიც ცოლ-ქმარმა შეიფარა

📍ეს ვაქცინა არის 85% ეფექტური მაიმუნის ყვავილის ვირუსი წინააღმდეგ! - გიორგი ფხაკაძე