საქართველოს კულტურული მემკვიდრეობა: სვეტიცხოვლის სამხრეთ ნაწილში წყლის ინფილტრაციასთან დაკავშირებით სატელევიზიო მედიაში გასულ სიუჟეტი არასწორია და ვფიქრობთ, ემსახურება საზოგადოების შეცდომაში შეყვანას

საქართველოს კულტურული მემკვიდრეობის დაცვის ეროვნული სააგენტო სატელევიზიო მედიაში გასულ სიუჟეტს ეხმაურება, სადაც საუბარია სვეტიცხოვლის საკათედრო ტაძრის სამხრეთ ნაწილში წყლის ინფილტრაციასთან დაკავშირებით.

„გვსურს, გამოვეხმაუროთ დღეს სატელევიზიო მედიაში გასულ სიუჟეტს სვეტიცხოვლის საკათედრო ტაძრის სამხრეთ ნაწილში წყლის ინფილტრაციასთან დაკავშირებით.

სამწუხაროდ, სიუჟეტში წარმოდგენილი შეფასებები არასწორია და ვფიქრობთ, ემსახურება საზოგადოების შეცდომაში შეყვანას.

სვეტიცხოვლის საკათედრო ტაძარში სააგენტო რეგულარულად ატარებს მონიტორინგს, გეგმავს და ახორციელებს სხვადასხვა სარესტავრაციო-საკონსერვაციო სამუშაოებს.

წყლის ინფილტრაციის ფაქტის დაფიქსირებისთანავე სააგენტოს ხელმძღვანელობა დაუყოვნებლივ ჩავიდა ადგილზე და სპეციალისტებთან ერთად შეისწავლა არსებული მდგომარეობა, გამოკვეთა ინფილტრაციის სავარაუდო გამომწვევი მიზეზები და დაგეგმა პირველადი გადაუდებელი ღონისძიებები.

კულტურული მემკვიდრეობის ძეგლებზე ნაჩქარევი გადაწყვეტილებების მიღება დაუშვებელია. ამდენად, მოვუწოდებთ ყველას, თავი შეიკავონ არასწორი ინფორმაციის გავრცელებისგან და დარგის სპეციალისტებს მუშაობის შესაძლებლობა მისცენ.

საზოგადოებას მოვახსენებთ, რომ სვეტიცხოველში გუშინ აღმოჩენილი პრობლემა უმოკლეს ვადებში აღმოიფხვრება და აღნიშნულთან დაკავშირებით რეგულარულად გავრცელდება განახლებული ინფორმაცია“, - ნათქვამია გავრცელებულ ინფორმაციაში.