სოფო ნიკოლაიშვილი: ძალიან ტრაგიკულია ის სიტუაცია, როდესაც შენს კოლეგას უხარია შენი ცუდი, შენი დარბევა, დასანქცირება მხოლოდ იმიტომ, რომ შენ ხარ ძლიერი, უფრო რეიტინგული და უფრო პროფესიონალი

„იმედის“ პროდიუსერმა და ჟურნალისტმა სოფო ნიკოლაიშვილმა გადაცემაში „იმედის კვირა“ ბრიტანეთის მიერ თავისუფალ მედიაზე თავდასხმაზე ისაუბრა.

ნიკოლაიშვილის თქმით, ტრაგიკულია, როდესაც შენს კოლეგას შენი ცუდი უხარია.

„ძალიან ტრაგიკულია ის სიტუაცია, როდესაც შენს კოლეგას უხარია შენი ცუდი, შენი დარბევა, დასანქცირება მხოლოდ იმიტომ, რომ შენ ხარ ძლიერი, უფრო რეიტინგული, უფრო პროფესიონალი და არ გადაიქეცი პარტიულ მუშაკად, პარტიულ პროპაგანდისტად და პარტიულ გამხმოვანებლად“, - აღნიშნა სოფო ნიკოლაიშვილმა.

„იმედის კვირამ“ დიდი ბრიტანეთის საგარეო საქმეთა მინისტრს მისი ქვეყნის მთავრობის მიერ ტელეკომპანია „იმედისთვის“ დაწესებული სანქციების შესახებ ოფიციალური წერილით მიმართა.

როგორც ცნობილია, დიდი ბრიტანეთის მთავრობამ ქართული ტელეკომპანიების, „იმედისა“ და „პოსტივის“ წინააღმდეგ სანქციები შემოიღო. შესაბამისი ინფორმაცია ბრიტანეთის მთავრობის ვებ-გვერდზეა გამოქვეყნებული.

თავისუფალ მედიაზე დიდი ბრიტანეთის თავდასხმის გამო საქართველოში დიდი ბრიტანეთის ელჩი საგარეო საქმეთა სამინისტროში იყო დაბარებული. მან შეხვედრა კომენტარის გარეშე დატოვა.

საგარეო საქმეთა მინისტრ მაკა ბოჭორიშვილის განცხადებით, 40 წუთის განმავლობაში მას არ მოუსმენია არც ერთი არგუმენტი, რომელიც გაამართლებდა იმ გადაწყვეტილებას, რომელიც მიიღო ლონდონმა.

დიდი ბრიტანეთის თავდასხმასთან დაკავშირებით განცხადება გაავრცელა ტელეკომპანია „იმედმა“.