სოზარ სუბარი სააკაშვილს: ყველა იმ ოჯახების ნომრებს მივაწოდებ, რომელთა ოჯახის წევრები მისი ბრძანებით ქუჩაში მოკლეს, ბოდიში მოუხადოს - სასჯელი მოიხადოს და შემდეგ ვილაპარაკოთ შერიგებაზე

პარლამენტის თვითმმართველობის კომიტეტის თავმჯდომარე, სოზარ სუბარი ეროვნულ შერიგებასთან დაკავშირებით მიხეილ სააკაშვილის გუშინდელ განცხადებას გამოეხმაურა.

როგორც სუბარმა განაცხადა, სააკაშვილმა ჯერ სასჯელი უნდა მოიხადოს და შერიგებაზე შემდეგ ილაპარაკოს.

"შეთავაზება მიღებულია, დოდო აფრასიძის ნომერს მივაწოდებ მიხეილ სააკაშვილს, რომელმაც თავად აღიარა, რომ ოჯახის განადგურების ბრძანება გასცა. მას შეხვდეს, დაელაპარაკოს, ბოდიში მოუხადოს და პატიება მიიღოს.

მას ყველა იმ ოჯახების ნომრებს მივაწოდებ, რომელთა ოჯახის წევრები მისი ბრძანებით ქუჩაში მოკლეს, იყვნენ ციხეში ნაწამები, გაუპატიურებული. მათ ბოდიში მოუხადოს და პატიება მიიღოს. სასჯელი მოიხადოს და შემდეგ ვილაპარაკოთ შერიგებაზე.

„ნაციონალური მოძრაობა“ კი, დაელოდოს 2024 წლის საპარლამენტო არჩევნებს. მიხეილ სააკაშვილს ასეულობით ოჯახს ჩამოვუთვლი, რომელთა ოჯახის წევრები მისი პირადი ბრძანებით მოკლეს. აფრასიძეებს იმიტომ ვახსენებ, რომ პირადად აღიარა, რომ ოჯახის განადგურების ბრძანება გასცა. გამოსავალი ძალიან მარტივია – ვინც პარლამენტში შემოვიდა, იმუშაოს ქვეყნის უკეთეს მომავალზე, ევროინტეგრაციაზე, ეკონომიკაზე და ა.შ. საკრებულოებში 30 პროცენტი ოპოზიციის არის, მივიდნენ და დესტრუქციით ნუ იქნებიან დაკავებული.

სასჯელი უნდა აღსრულდეს, როცა სასამართლოს მიერ არის გამოტანილი. ეს არის ნორმალური ვითარება, ამის გარეშე არც ერთი ქვეყანა არ განვითარებულა და ვერც განვითარდება. როცა პროცესების ქუჩაში გადატანა უნდათ, ამით პოლარიზაციის შემცირება და შერიგება არ ხდება.  თუ ასე გააგრძელებენ, შანსი მეცხრე არჩევნებზეც არ ექნებათ", – განაცხადა სუბარმა.

ასევე დაგაინტერესებთ:

🔲 „არ წახვიდეთ, აქ ვიბრძოლოთ ერთად!“- მიხეილ სააკაშვილი მორიგ მიმართვას ავრცელებს

🔲 რეესტრმა "ალტ-ინფოს" პარტია - "კონსერვატიული მოძრაობა" დაარეგისტრირა