ემიგრაცია: „რა რთულია ერთდროულად იყო შინ, გარეთ და სამსახურში... იყო დედა, დიასახლისი და თან გაუძღვე ბიზნესს, რომლის დაარსებაც დამოუკიდებლად, მარტომ, ყველას დახმარების გარეშე შევძელი“

მოგეხსენებათ, რომ დღეს ათი ათასობით ქართველი ცდილობს ემიგრაციის გზით თავი დააღწიოს ეკონომიკურ კრიზისს, სიდუხჭირეს და სხვა საჭიროებებს, რომელთა ხელმისაწვდომობაც საკუთარ სამშობლოში ვერ შეძლეს. მზარდი ემიგრაციის ფონზე, მიმღებ ქვეყნებში არსებული დიასპორა ინტეგრაციის პროცესს იწყებს და ქმნის სხვადასხვა სოციალურ თუ მომსახურების სფეროს სივრცეს.

იტალიური და ინგლისური ენების და ინფორმატიკის მასწავლებელი, თარჯიმანი, ვიქტორია ცუხიშვილი, სწორედ ის ემიგრანტი გახლავთ, რომელმაც ყველა ბარიერი გადალახა და იტალიაში, ქალაქ ბარში სასწავლო ცენტრი „ვიქტორია“  დააარსა, რომელიც ფუნქციონირებას ოფიციალურად 9 ოქტომბერს დაიწყებს. 

უცხო ქვეყანაში პროფესიული და ამავდროულად საკუთარი საქმიანობის წამოწყება დიდ ძალისხმევასა და რესურსს საჭიროებს, თუმცა არსებობს მეტად უხერხული ფენომენი, რომლის შესახებაც ვიქტორია ცუხიშვილმა ახლახან სოციალურ ქსელში წერილი გამოაქვეყნა.  

„რა რთულია ერთდროულად იყო შინ, გარეთ და სამსახურში... იყო დედა, დიასახლისი და თან გაუძღვე ბიზნესს, რომლის დაარსებაც დამოუკიდებლად, მარტომ, ყველას დახმარების გარეშე შევძელი. რა რთულია, როცა ადამიანები შორიდან გიცქერენ, გაკვირდებიან და არიან იმის მოლოდინში რა მოხდება... როცა იმედი აქვთ, რომ ამ რთულ საქმეს ადამიანი მარტოკა ვერ გაართმევს თავს... როცა ელოდებიან როდის დაეცემი, რომ გაიხარონ... როცა ხელს არავინ გამოგიწვდიბს და სხვათა შორის მაინც არ გკითხავს: "როგორ ხარ? დახმარება ხომ არ გინდა?" ... რა რთულია, როცა იცი ყველას ნიღბის მიღმა არსებული რეალური სახე... რა რთულია გაუძლო ამდენ სიცივეს და უგულობას... და მაინც, პირობას ვდებ რომ გავუძლებ ყველა სირთულეს, გავუძლებ და შევძლებ ყველაფერს, რაც კი მაქვს ჩაფიქრებული. ვერავინ და ვერაფერი გამტეხს!“ - წერს ვიქტორია.

საკითხს, რომლის შესახებაც სასწავლო ცენტრის დამაარსებელი წერს, ემიგრანტებისთვის არახალია. სამწუხაროდ საემიგრაციო საზოგადოებაში ხშირად ფიქსირდება მხარდაჭერის ნაკლებობა და წარმატებული ან რეალიზებული ემიგრანტების მიმართ ერთგვარი ჩუმი პროტესტი. ნაცვლად იმისა, რომ დიასპორამ ხელი შეუწყოს ემიგრაციაში არსებული ქართული თემის განვითარებას, მონდომებით ცდილობენ ზიანი მიაყენონ პიროვნებას ან მის საქმიანობას. 

რა ფენომენთან გვაქვს საქმე, ამაზე მსჯელობა მკითხველისთვის მიმინდვია.

ავტორი: ხათუნა შარაძე. იტალია.

აგრეთვე დაგაინტერესებთ:

📌 სასიხარულო ინფორმაცია ემიგრანტებისთვის!!!! ქალაქ ბარიში სასწავლო ცენტრი გაიხსნა

📌 ვისაც იტალიური ენის სრულფასოვნად შესწავლა სურს, - თქვენთვის სიახლეა!

📌 მალე, ქალაქ ბარიში ქართველებისთვის სასწავლო ცენტრი გაიხსნება - გაიცანით, 4 შვილის დედა და იტალიური ენის მასწავლებელი იტალიაში, ვიქტორია ცუხიშვილი