როგორ აღნიშნეს "თბილისობა" ათენში - ვიდეო

ათენში „თბილისობა“ აღნიშნეს. ღალაცის პარკში, ქართული სიმღერები და ქართული ლექსები მთელი დღის განმავლობაში ისმოდა.

"ქართული კულტურის ზეიმი" - ასე შეაფასა ათენში გამართული ღონისძიება საქართველოს ელჩმა საბერძნეთში, დავით დონდუამ.

ელჩის განცხადებით, ღონისძიებისგან შემოსული თანხა სოლიდარობის ფონდში გადაირიცხება და სიმსივნით დაავადებული ბავშვების მკურნალობას მოხმარდება.

„ყოველგვარ მოლოდინს გადააჭარბა იმან, რაც დღეს ვიხილეთ. ეს იყო ნამდვილი ზეიმი ქართული კულტურის ათენში. დიდი მადლობა მინდა ვუთხრა ამ ღონისძიების ორგანიზატორს ქალბატონ ხატია ქარსაულიძეს და მის ორგანიზაციას ბერძნულ-ქართული კულტურის ასოციაციას ამ ინიციატივისთვის.

ასევე ყველა ქართულ დიასპორულ ორგანიზაციას თანადგომისთვის, რომელიც ქართული განათლებისა და კულტურის სფეროში მოღვაწეობს.

უამრავი სტუმარი გვყავდა, როგორც ქართველი, ასე ბერძენი.

რამდენიმე საათის განმავლობაში ჟღერდა ქართული ლექსები, სიმღერა, ცეკვა, თეატრი, თოჯინების თეატრი, ყველაფერი ის რითაც მდიდარი არის ქართული კულტურა. აქვე გეტყვით, რომ რომ ეს იყო ჰუმანიტარული ხასიათის აქცია. შეგროვებული თანხა გადაირიცხება სოლიდარობის ფონდში და მოხმარდება სიმსივნით დაავადებული ბავშვების მკურნალობას“, -აღნიშნა საქართველოს ელჩმა საბერძნეთში.

როგორც "ბერძნულ - ქართული კულტურული ასოციაციის" ხელმძღვანელმა ხატია ქარსაულიძემ განაცხადა, აღნიშნული ღონისძიებით, ემიგრანტები მეორე სამშობლოდან საქართველოს ეფერებიან.

"ვეფერებით ერთი სამშობლოდან მეორე სამშობლოს. ერთი სამშობლოს დედაქალაქიდან მეორე სამშობლოს დედაქალაქს.

დღეს თბილისს მოვეფერეთ.

დიდი მადლობა ყველა ორგანიზაციას გვერდში დგომისთვის. მადლობა საქართველოს საელჩოს მხარდაჭერისთვის, ყველა მონაწილეს და იმ ადამიანს, რომელმაც იღვაწა, რომ დღევანდელი ღონისძიება ასეთი სახით ჩაგვეტარებინა", - აღნიშნა ღონისძიების ორგანიზატორმა ხატია ქარსაულიძემ.

ასევე დაგაინტერესებთ:

🔵 2022 წელს საქართველოს ევროვიზიის სიმღერის კონკურსზე ჯგუფი Circus Mircus წარადგენს