29 ივნისს, სამების საკათედრო ტაძრის გუნდი, ვატიკანში კონცერტს გამართავს

პირველად საქართველოს ისტორიაში, სამების საკათედრო ტაძრის საპატრიარქოს 40-კაციანი გუნდი ვატიკანში კონცერტს გამართავს. 29 ივნისს, სიქსტის კაპელასა და წმინდა პეტრეს ტაძარში, ქართული მრავალხმიანი სიმღერა გაისმება. წმინდა პეტრეს ტაძარში, რომის პაპის ფრანცისკეს მიერ პეტრე-პავლობის დღესასწაულთან დაკავშირებით აღვლენილი საზეიმო მესის შემდეგ, უწმიდესისა და უნეტარესის, სრულიად საქართველოს კათოლიკოს-პატრიარქის ილია მეორის მიერ დაფუძნებული სამების საკათედრო გუნდი, სვიმონ ჯანგულაშვილის ხელმძღვანელობით შეასრულებს ქართულ მრავალხმიან სიმღერებს. განსაკუთრებით აღსანიშნავია, რომ გუნდი პატრიარქის მიერ შექმნილ ,,ავე მარიასაც".

საქართველოს კათოლიკოს-პატრიარქმა ილია მეორემ სამების საკათედრო ტაძრის მგალობელთა გუნდი ვატიკანში გამგზავრებამდე მიიღო და დალოცა.

ღონისძიება კულტურის სამინისტროს მხარდაჭერით ხორციელდება და სულ მალე სამების საკათედრო ტაძრის საპატრიარქო გუნდი ვატიკანში გაემგზავრება.

აღნიშნულთან დაკავშირებით ვატიკანის ელჩმა საქართველოში, მისმა აღმატებულება ჟოზე აველინო ბეტანკურმა, ვატიკანის საელჩოში უმასპინძლა საქართველოს კულტურის მინისტრს, თეა წულუკიანს, მინისტრის პირველ მოადგილეს, კახა სიხარულიძეს, საგარეო საქმეთა მინისტრის პირველ მოადგილეს, ლაშა დარსალიას, პროტოპრესვიტერ გიორგი ზვიადაძეს, ასევე, კულტურის სამინისტროსა და საპატრიარქოს წარმომადგენლებს.

მინისტრმა მიულოცა პროცესში ჩართულ ყველა მონაწილეს ეს ისტორიული დღე, მადლობა გადაუხადა ვატიკანის ელჩს და სამინისტროს კულტურის დეპარტამენტებს ამ დიდი პროექტის განხორციელებაში შეტანილი წვლილისთვის.ჟოზე აველინო ბეტანკურმა შეხევდრისას აღნიშნა, რომ ქართული მრავალსაუკუნოვანი საგალობლების აჟღერება განსაკუთრებით მნიშვნელოვანია ამ მძიმე დროს, როდესაც ევროპაში ომი მძვინვარებს. შეხვედრისას სამების მგალობელთა გუნდმა შეასრულა რამდენიმე ნაწარმოები საკუთარი რეპერტუარიდან.

მგალობელთა გუნდი ვატიკანში საკუთარი რეპერტუარიდან ჯამში 20 სიმღერას შეასრულებს, მათ შორისაა: „ოროველა“, „შენ ხარ ვენახი“, „ჩაკრულო“, "ლილე" , "ოდოია", "წმიდაო ღმერთო", ,,Kyrie Eleison", ,,Ave Maria"  (სრულიად საქართველოს კათოლიკოს პატრიარქი ილია II ), 121-ე ფსალმუნი (იოსებ ბარდანაშვილი), ,,შეყვარებულნი ოდეს ქარები",  ,,წუთისოფელი", (ზვიად ბოლქვაძე), ,,ლაშარის გზაზე", ,,ეგზერსისი" (იოსებ კეჭაყმაძე), ,,მინიატიურები" (გია ყანჩელი).