9 წლის ქართველ გოგონას იტალიაში საპატიო ელჩის სიმბოლური წოდება მიანიჭეს

იტალიაში გამართულ, ქართული ტურისტული კომპანიის „არგონავტების ოქრო“ პრეზენტაციას ქალაქის მერი, დომი ჩილიბერტი ესწრებოდა, რომელმაც სიტყვით გამოსვლისას, პატარა ქართველი გოგონა საპატიო ელჩად დაასახელა და 9 წლის მარიამ ბოკუჩავას საპატიო ელჩის სიმბოლური წოდება მიანიჭა. 

ქართული ტურისტული კომპანიის პრეზენტაციას, ასევე ესწრებოდა გენერალური კონსული ვახტანგ ანდღულაძე და ვიცე კონსული ხატია ჭელიძე.

„ვიცი რომ კარგად ფლობ იტალიურ ენას და ჩვენი ქალაქის მკვიდრი ხარ, რის გამოც ჩვენმა კომუნამ გადაწყვიტა მოგანიჭოს ქალაქში მცხოვრები, ქართველებისა და კასტელა გროტეს შემაკავშირებელი რგოლის, საპატიო წარმომადგენლის წოდება.“ - მიმართა ქალაქის მერმა 9 წლის მარიამ ბოკუჩავას.

მარიამ ბოკუჩავა, იტალიაში 2018 წლიდან მშობლებთან ერთად ცხოვრობს. მარიამის დედამ, ჟურნალისტმა ხათუნა შარაძემ, იტალიაში მცხოვრებ კოლეგასთან, ნინა მამუკაძესთან ერთად ტურისტული კომპანია „არგონავტების ოქრო“ დააფუძნა, რომელიც საქართველოში შემომყვან ტურიზმზე იმუშავებს.

„შენ, ჩვენს ქალაქში იქნები ინტეგრირებული ემიგრანტის  საუკეთესო წარმომადგენელი და მემკვიდრე.“  - აღნიშნა დომი ჩილიბერტიმ და ხაზი გაუსვა ინტეგრაციის უპირატესობასა და დემოკრატიულ სახელმწიფოში ადამიანის უფლებების უზენაესობას, თანამეგობრობასა და ორ ქვეყანას შორის არსებულ ურთიერთანამშრომლობის ევროპულ ფასეულობებს.

ქალაქის მერმა, ასევე ისაუბრა ორ ქვეყანას შორის არსებულ ტურისტულ პოტენციალსა და იმ პროექტების მხარდაჭერაზე, რომელიც კიდევ უფრო გააღრმავებს თანამშრომლობის პერსპექტივებს. საუბარია ქალაქ კასტელანა გროტესა და ოზურგეთის მუნიციპალიტეტის დაძმობილების პროექტზე, რომელიც კულტურათაშორისი გაცვლითი პროგრამის ფარგლებში უნდა განხორციელდეს.

მარიამ ბოკუჩავა წარმოშობით ოზურგეთის მუნიციპალიტეტიდან გახლავთ და იტალიაში მშობლებთან, კონსტანტინე ბოკუჩავასთან და ხათუნა შარაძესთან ერთად ცხოვრობს.

„ვხედავთ რომ აქ ხართ და ხართ ბედნიერები და ამაყები თქვენი საქმიანობით. ვხედავ, რომ პატივს სცემთ იტალიას და იტალიელ ხალხს, მაგრამ როცა საუბარს საქართველოზე იწყებთ თქვენს თვალებში სულ სხვანაირი სხივი ჩნდება. ჩვენი პატარა ქალაქი  მოხარულია თქვენ, როგორც ქართული დიასპორის ნაწილი წარმოადგენდეთ კასტელანას საზოგადოებას. ხოლო პატარა მარიამი კი კასტელანა გროტესა და საქართველოს შორის მჭიდრო ურთიერთობების გამყარების ეგიდით საპატიო ელჩი იქნება“ -  განაცხადა დომი ჩილიბერტიმ მარიამის დედასთან, ხათუნა შარაძესთან საუბარში.

აგრეთვე დაგაინტერესებთ:

📌 იტალიაში ქართული ტურისტული კომპანიის „არგონავტების ოქრო“ პრეზენტაცია გაიმართა

📌 იტალია - საქართველოს გენერალური კონსული, ადგილობრივი მთავრობის წარმომადგენლებს შეხვდა