იტალიის შინაგან საქმეთა სამინისტრო ახალი წლის დღეებში პატრულირებას აძლიერებს

იტალიის შინაგან საქმეთა სამინისტრო ახალი წლის ღამეს პატრულირებას აძლიერებს. რეგულაციების შემოღება და კონტროლის გამკაცრება ეპიდსიტუაციიდან გამომდინარე მიიღეს. შინაგან საქმეთა მინისტრის ლუჩიანა ლამორგეზეს კაბინეტის ხელმძღვანელმა, ბრუნო ფრატასიმ ხელი მოაწერა შეზღუდვების ახალ დოკუმენტს და გაუგზავნა ყველა მათ დაქვემდებარებულ განყოფილებას.

ოფიციალურ დოკუმენტში შეზღუდვების დრო 31 დეკემბრიდან 6 იანვრის ჩათვლით განისაზღვრა. კონტროლის მიზანმიმართული გაძლიერება ეს არის დოკუმენტის ცენტრალური პუნქტი, რომელიც მჭიდროდ მიჰყვება იმ დოკუმენტებს, რომლებიც უკვე მიიღეს ადგილობრივ დონეზე მერებმა და რეგიონების პრეზიდენტებმა.

იქნება მეტი პატრული, რათა შეამოწმონ რომ ყველა პატივს სცემს და იცავს კანონით დადგენილ წესებს ახალი წლის დღეებში. სავალდებულო რჩება სამედიცინო  ნიღბების გაკეთება ღია სივრცეშიც კი. ამავე კონტროლის მიზეზით, დისკოთეკებზე და მსგავს ხალხმრავალ შეკრებებზე დასწრება აკრძალულია. ღამის კლუბების გახსნას  1 თებერვლიდან ვარაუდობენ.

კონტროლი წესდება სოციალურ მედიაშიც, სადაც იმ პოსტებზე გაკეთდება აქცენტი, რომლებიც რეკლამირებას გაუწევენ სხვადასხვა სახის ფარულ წვეულებებსა თუ სადილებს. რესტორნები რეგულარულად იმუშავებს, მაგრამ სუფრასთან ჯდომა მხოლოდ ,,სუპერმწვანე კოვიდპასპორტის" მფლობელებს შეეძლებათ. წინააღმდეგ შემთხვევაში დაჯარიმდებიან როგორც მომხმარებლები, ასევე რესტორნის მენეჯერები.

განსხვავებული წესებია მათთვის, ვინც ახალი წლის შეხვედრას სახლში ოჯახის წევრების და მეგობრების გარემოცვაში გეგმავს. მათ ურჩევენ ვახშამზე, ახალი წლის ღამეს შეამცირონ სტუმრების რაოდენობა და შემოიფარგლონ ძალიან ახლო წრით.

ნონა გედენიძე

იტალია, რეჯო-ემილია