იტალიური ენის გამოცდა A2 - რა შემთხვევაში გჭირდებათ ენის სერტიფიკატი?

იტალიაში ხანგრძლივად მცხოვრები უცხოელებისთვის, ძალიან მნიშვნელოვანია იტალიური ენის ცოდნის დამადასტურებელი დოკუმენტი, ანუ იტალიური ენის საბაზისო ცოდნის A2 დონის ტესტის გავლა, რომელიც მოგცემთ ხანგრძლივი ბინადრობის ნებართვაზე წვდომას. რა თქმა უნდა, სხვა აუცილებელი რეკვიზიტების არსებობის შემთხვევაში.

იტალიური ენის სერტიფიკატი A2, აუცილებელია უცხო ქვეყნის იმ მოქალაქისთვის, რომელიც ლეგალურად ცხოვრობს იტალიაში უკვე მინიმუმ 5 წელია და აპირებს ხანგრძლივი ბინადრობის ნებართვის აღებას. აღნიშნული კანონი იტალიაში 2010 წლიდან მოქმედებს.

როგორ ხდება ტესტისთვის გამოცდის დაჯავშნა?

განაცხადი უნდა გაიგზავნოს იმ პროვინციის პრეფექტურაში, სადაც ცხოვრობს უცხო ქვეყნის მოქალაქე. რეგისტრაციის პროცედურის გავლა ხდება ონლაინ, სპეციალურ ვებსაიტზე: https://portaleservizi.dlci.interno.it/

შესაბამისი უწყება, პირს, განაცხადის გაკეთებიდან 60 დღის განმავლობაში აცნობებს თარიღს და მისამართს, გამოცდის ჩასაბარებლად.

გამოცდის წარმატებით გადალახვის შემთხვევაში, პრეფექტურა გადასცემს ინფორმაციას ქვესტურას, რომელიც თავის მხრივ, სხვა რეკვიზიტების არსებობის შემთხვევაში, გასცემს ხანგრძლივ ბინადრობის ნებართვას. გამოცდის შედეგების ნახვა ასევე შესაძლებელია ზემოთ მითითებულ ვებსაიტზე.

თუ პირი ვერ გადალახავს გამოცდას, იგივე პროცედურის გავლა პასუხის მიღებიდან 90 დღის შემდეგ შეუძლია.

გამოცდის ჩაბარებისგან თავისუფლდებიან 14 წლამდე პირები და ასევე პირები, რომელთაც აქვთ ჯანმრთელობის პრობლემა, რომელიც ენის ათვისებას უშლის ხელს. ეს მდგომარეობა, აუცილებლად დოკუმენტურად უნდა იყოს დამოწმებული.

გამოცდა დაახლოებით 2 საათს გრძელდება და მისი ღირებულება ოფიციალურად 40 ევროს შეადგენს.

ნინა მამუკაძე

იტალია|ფლორენცია