პირი რომელიც ეკლესიებს ცეცხლს უკიდებდა, მოძღვარმა შეიწყალა

კამერანოს ეკლესიის წინამძღვარმა ალდო პიერონიმ, 60 წლის ჯუზეპე ეუზების, სასამართლო პროცესზე განაცხადა, რომ სარჩელი უკან გაჰქონდა და ბრალდებულს ყველაფერს პატიობდა. ჯუზეპე ეუზები, თვეების განმავლობაში, რეგიონში არსებულ ეკლესიებს ცეცხლს უკიდებდა, ხოლო ალდო პიერონისა და სხვა სასულიერო პირებს მუქარის წერილებს უგზავნიდა და სიკვდილით ემუქრებოდა.

სასამართლო პროცესზე დაცვის მხარემ მიმართა სასულიერო პირს, ხომ არ ჰქონდა სურვილი ეპატიებინა ბრალდებულისთვის და გაეტანა სარჩელი. პასუხად ალდო პიერონიმ განაცხადა: „ეს ადამიანი გამუდმებით ბოდიშის წერილებს მიგზავნის, ინანიებს საკუთარ საქციელს, მე უკვე ვაპატიე, ამიტომ, სარჩელი გამაქვს“.

მსგავსად მოიქცა კიდევ რამდენიმე ეკლესიის წინამძღვარიც, რომელთა ეკლესიებიც ასევე დააზიანა პირომანმა.

თუ რატომ უკიდებდა ცეცხლს ეკლესიებს და რატომ ემუქრებოდა სიკვდილით სასულიერო პირებს, ამაზე ბრალდებულმა ასეთი პასუხი გასცა: „იმ პერიოდში მეც და ჩემი მეუღლეც სრულ სასოწარკვეთაში ვიყავით, რადგან ორივე უმუშევრები დავრჩით, ასეთი საქციელისკენ სასულიერო პირების საქმიანობამ მიბიძგა, რომლებიც გამუდმებით ეხმარებოდნენ ემიგრანტებს“.

თვეების განმავლობაში პოლიცია ვერ არკვევდა, თუ ვინ აჩენდა ხანძარს ეკლესიაში, მაგრამ დამნაშავემ თავი შემთხვევით გამოააშკარავა, როდესაც მორიგი ხანძრის გაჩენისას თავად დარეკა სახანძრო სამსახურში, რაც შემდგომ სათვალთვალო კამერების საშუალებითაც დადასტურდა.

მიუხედავად მომჩივანი მხარეების მიერ საჩივრების გატანისა, საქმე არ დახურულა და მომდევნო სასამართლო პროცესი 13 დეკემბერს ჩაინიშნა.

წყარო: Ansa.it