„აუცილებლად უნდა მოიხადოს ბოდიში... მშობლებისთვის, როცა ვცდილობთ, ცნობიერება ავამაღლოთ, ეს არის კატასტროფა“ - აუტიზმის მქონე ბავშვის მშობელი გიორგი ვაშაძის განცხადებაზე

„სტრატეგია აღმაშენებლის“ ლიდერის გიორგი ვაშაძის განცხადებას, რომლის თანახმად ვაშაძემ სატელევიზიო ეთერში აუტისტური სპექტრის მქონე ადამიანები დამამცირებელ კონტექსტში მოიხსენია, აუტიზმის მქონე ბავშვების მშობლები და უფლებადამცველები განცხადებებით ეხმაურებიან.

„დაიჯესტი“ აუტიზმის მქონე ერთ-ერთი ბავშვის მშობელს თამარ იარაჯულს დაუკავშირდა და მოისმინა, თუ რას ფიქრობს იგი ამ თემაზე. 

„რა თქმა უნდა მსგავსი სტატუსით ნებისმიერი პოლიტიკოსის მოხსენიება ამაზრზენია, მნიშვნელობა არ აქვს ვინ არის, მსგავსი საქციელი არის ძალიან დამამცირებელი, იგივე მისთვის და ნებისმიერი პოლიტიკოსისთვის და არა აუტისტური სპექტრის მქონე ადამიანებისთვის.

ვფიქრობ, მან აუცილებლად უნდა მოიხადოს ბოდიში და არ ვიცი, რანაირად შეიძლება მსგავსი საქციელის გამოსწორება, მაგრამ ეს ამ საუკუნეში და ამდენი შრომის შემდეგ მშობლისთვის, როცა ვცდილობთ, რაღაცნაირად ცნობიერება ავამაღლოთ, არის კატასტროფა, როდესაც ასე მოიხსენიებს ნებისმიერ ადამიანს, ნებისმიერი პოლიტიკოსი იქნება თუ საჯარო მოხელე.

ძალიან ცუდი ფაქტი მოხდა“, - განუცხადა თამარ იარაჯულმა „დაიჯესტს“.

გარდა ჩვენთან გაკეთებული ინტერვიუსა, აღნიშნულ საკითხზე თამარ იარაჯულმა ახლახან სოციალურ ქსელში პოსტი გამოაქვეყნა:

„შეგნებულად არ ვდებ გიორგი ვაშაძის მიერ განცხადებას, რომელიც ეხება აუტისტურ სპექტრს, სამარცხვინოა ამ საუკუნეში და მშობლების ამდენი შრომის შემდეგ დამამცირებელ კონტექსტში აუტიზმის ასე მოხსენიება და მოვითხოვთ ყველა ბოდიშს, ბატონო გიორგი, ველოდებით პირველ რიგში ბოდიშს.

როდის გათენდება ამ ქვეყანაში“, - წერს  თამარ იარაჯული.