ბექა დავითულიანი: გელათის რეაბილიტაციისთვის ოთხი მთავარი კვლევა ჩატარდა, რომ რისკები გათვალისწინებული იყოს რეაბილიტაციის დროს. ეს არ მომხდარა აქამდე არც ერთხელ  

ახლა ჩატარდა ოთხი მთავარი კვლევა - გელათის და მისი მიმდებარე ტერიტორიის სრული გეოლოგიური კვლევა, რომ რისკები გათვალისწინებული იყოს რეაბილიტაციის დროს. ეს არ მომხდარა არც ერთხელ აქამდე, - განაცხადა გადაცემაში „დღის ქრონიკა“ საქართველოს კულტურის მინისტრის მოადგილემ, ბექა დავითულიანმა გელათის რეაბილიტაციასთან დაკავშირებით.

„საბჭოთა კავშირიდან მოყოლებული ტარდებოდა მასშტაბური რეაბილიტაცია და კვლევებიც, თუმცა არ იყო იმ ხარისხის, რაც ახლა. ახლა ჩატარდა ოთხი მთავარი კვლევა - გელათის და მისი მიმდებარე ტერიტორიის სრული გეოლოგიური კვლევა, რომ რისკები გათვალისწინებული იყოს რეაბილიტაციის დროს. ეს არ მომხდარა არც ერთხელ აქამდე. მეორე - წყალარინების პრობლემა მოგვარდება. შესწავლილი იქნა როგორ აღარ ჩავიდეს წყალი.

მესამე - შესწავლილი იქნა რა მასალებით უნდა მოხდეს თვითონ შენობის რეაბილიტაცია. მეოთხე - მხატვრობა და მოზაიკა. ამაზე იყო მასშტაბური კვლევა რა მასალებია რომელსაც მიიღებს ხატი და მომავალში ფრესკებზე პრობლემას არ შექმნის და მოზაიკა რით შეიძლება რეაბილიტირდეს. ყველა ეს კვლევა ჩატარებულია და ახლა გვეძლევა საშუალება უშუალოდ რეაბილიტაციის პროცესზე გადავიდეთ“, - აღნიშნა დავითულიანმა.

მისი თქმით, სრული რეაბილიტაცია წლებს მოითხოვს, თუმცა პირველი ეტაპი, რაც სახურავის რეაბილიტაციას მოიცავს, რომ წყალი აღარ ჩავიდეს შენობაში, წელიწად ნახევარში, ან ორ წელიწადში დასრულდება.