ექიმი, რომელიც პანდემიის დაწყებიდან შიშველი ხელებით ჩვენს გადარჩენას ცდილობდა, ახლა მეოთხე სტადიის სიმსივნეს ებრძვის

ყველასთვის ცნობილი დათო ექიმი მეოთხე სტადიის სიმსივნეს ებრძვის. ექიმი, პანდემიის დაწყებიდან შიშველი ხელებით, თითოეული ჩვენგანის გადარჩენას ცდილობდა, ახლა კი სიცოცხლისთვის  თავად იბრძვის.

დათო მურვანიძეს, ბათუმის ინფექციური საავადმყოფოს კლინიკურ დირექტორს, ფილტვის მეოთხე სტადიის ავთვისებიანი სიმსივნე დაუდასტურდა.

ექიმის გადასარჩენად გაერთიანდა ყველა: ოპოზიცია, პოზიცია, ექიმები, პედაგოგები, მოქალაქეები და სამოქალაქო აქტივისტები. სოციალურ ქსელში არაერთი თხოვნა და მოწოდება ვრცელდება.

ირაკლი კუპრაძე, პარტია „ლელოს“ აჭარის ორგანიზაციის ლიდერი:

„დათო მურვანიძე არის კაცი, რომელიც ამდენ ხანს უამრავი ბათუმელის ნუგეში იყო. ამოდენა ცხოვრების გავლის შემდეგ, ახლა მას პირველად სჭირდება მოქალაქეებისგან მხარდაჭერა!“

ნინო ცხვარაძე, პარტია „ქართული ოცნება“. ბათუმის საკრებულოს წევრი:

„ჩვენი ქალაქის დათო მურვანიძე! თითოეული ბათუმელის გვერდით მდგომი და გულიანი ადამიანი! დათო ექიმს დღეს ჩვენი დახმარება სჭირდება!“

ციალა ქათამიძე, სამოქალაქო აქტივისტი: 

„ექიმი, ბათუმის ინფექციური ცენტრის კლინიკური მენეჯერი, რომელიც პანდემიის დაწყების პირველივე დღიდან, უკვე თითქმის ორი წელია ყოველდღიურად იბრძვის ჩვენი, ჩვენი ახლობლების, ჩვენი თანაქალაქელების და რა ვიცი, უბრალოდ ადამიანების სიცოცხლეების გადასარჩენად;

ცდილობს, თუ გადარჩენას ვერ შეძლებს, რამდენიმე საათით გაუხანგრძლივოს არსებობა მაინც...

ალბათ, ამ ბრძოლაში ხშირად შიშველი ხელებითაც შესულა, ხშირად ალბათ საკუთარი სიცოცხლის ფასადაც....

ჰოდა, რა ვიცი, ვფიქრობ, რომ მხოლოდ ჩემი რესურსები არ იქნება საკმარისი და თქვენც მინდა გთხოვოთ დახმარება...

მგონია, რომ აქვე, ამ წუთს, უკვე ჩვენ უნდა დავიწყოთ ბრძოლა, ამჯერად უკვე მისი სიცოცხლის გადასარჩენად! ყოველგვარი სამართლიანობა მოითხოვს, რომ ერთ ბოროტებასთან (პანდემიასთან) დაუღალავად და მამაცურად მებრძოლ ადამიანს ახლა ჩვენ დავეხმაროთ მეორე (სიმსივნე) ბოროტებასთან ბრძოლაში!“

ასევე საინტერესოა:

🔵 გმირის და კარატისტის კი არა, თინას მონას დაბადების დღეა დღეს - ნათია ფანჯიკიძე ირაკლი ალასანიაზე

🔵 ზვავსაშიშროების საფრთხის გამო საქართველოს გზების გარკვეულ მონაკვეთზე გადაადგილება აიკრძალა