გეკა გელაძე: 2026 წელს გვაქვს ამბიციური გეგმები შსს-ს რამდენიმე მიმართულებასთან დაკავშირებით. ეს არის სასაზღვრო პოლიციის გაძლიერება, საზღვრებზე მეტი კონტროლის მექანიზმის შექმნა, სანაპირო დაცვის ახალი აღჭურვილობის შეძენა

თითოეული პოლიციელისთვის ძალიან მნიშვნელოვანია, რომ ქვეყანაში იყოს უსაფრთხოება დაცული და ამისთვის ძალიან დიდ შრომას დებს, - განაცხადა გადაცემაში „იმედის კვირა“ საქართველოს შინაგან საქმეთა მინისტრმა, გეკა გელაძემ.

მისივე თქმით, პოლიციელების შრომის მაგალითად შეგვიძლია 4 ოქტომბერი მოვიყვანოთ, როდესაც მათ მაღალი სტანდარტით იმუშავეს.

„მაგალითად შეგვიძლია მოვიყვანოთ 4 ოქტომბრის მოვლენები, შსს-ს სხვადასხვა დანაყოფებმა რამხელა სტანდარტით იმუშავეს და რა პროპორციული ძალა გამოიყენეს. საბედნიეროდ არც ერთი მოქალაქე იმ დღეს არ დაშავებულა. რაც შეეხება პოლიციელებს, 35-მდე პოლიციელი დაშავდა. ნაწილი იყო განსაკუთრებით მძიმე. ჩვენი ექიმების დახმარებით ისინი კარგად გრძნობენ თავს და დღეს ახორციელებენ თავიანთ უფლება-მოვალეობას“, - აღნიშნა მინისტრმა.

გეკა გელაძემ ისაუბრა ნარკოდანაშაულთან ბრძოლაზეც და განმარტა, რომ საჰაერო, სახმელეთო და საპორტო პუნქტებში შექმნილია სპეციალიზებული დანაყოფები, რომლებიც სრულად არიან ორიენტირებული ნარკოდანაშაულის გახსნაზე.

„დღეის მდგომარეობით, როგორც საჰაერო, ისე სახმელეთო და საპორტო პუნქტებში შექმნილი გვაქვს სპეციალიზებული დანაყოფები, რომლებიც სრულად არიან ორიენტირებული ნარკოდანაშაულის გახსნაზე. ჩვენ როგორც საზოგადოებას დავპირდით, ძალიან მკაცრ პოლიტიკას ვატარებთ ნარკოდანაშაულის მიმართულებით. სტრუქტურული გაძლიერება ერთ-ერთი მთავარი გზავნილი იყო და ძალიან ეფექტურად მუშაობს აღნიშნული დანაყოფები.

მიმდინარე წელს ჩვენ შევიძინეთ სპეციალიზებული სკანერები, რომელსაც აქვს შესაძლებლობა, სხვადასხვა გზავნილში აღმოაჩინოს სხვადასხვა ნარკოტიკული ნივთიერებები“, - განმარტა გეკა გელაძემ.

შინაგან საქმეთა მინისტრმა ასევე ისაუბრა ორგანიზებულ დანაშაულთან ბრძოლაზეც და აღნიშნა, რომ მათი მხრიდან ძალიან ქმედითი, მნიშვნელოვანი და შედეგზე ორიენტირებული ნაბიჯები გადაიდგა ორგანიზებულ დანაშაულთან ბრძოლის მიმართულებით.

„ძალიან ქმედითი, მნიშვნელოვანი და შედეგზე ორიენტირებული ნაბიჯები გადავდგით ორგანიზებულ დანაშაულთან ბრძოლის მიმართულებით. საქართველოში მიმდინარე წელს 40 ათასი დანაშაულია რეგისტრირებული, საიდანაც გახსნის მაჩვენებელი გვაქვს 65%-მდე და წინა წელთან შედარებით მომხდარი დანაშაული რომ შევადაროთ, არის 3-დან 4% მდე შემცირებული, რაც თითოეული პოლიციელის, შსს-ს თანამშრომლის დამსახურებაა“, - დასძინა გელაძემ.

გეკა გელაძემ მომავალი 2026 წლის გეგმებზეც ისაუბრა და აღნიშნა, რომ იგეგმება სასაზღვრო პოლიციის გაძლიერება და საზღვრებზე კიდევ უფრო მეტი კონტროლის მექანიზმის შექმნა.

„ძალიან საინტერესო წელი გვექნება 2026 წელი. მინდა საზოგადოებას კიდევ ერთხელ დავპირდე, რომ ყველა აღნიშნული გამოწვევის წინაშე ვიქნებით ძალიან მკაცრი. ასევე, შემდეგ წელს გვაქვს საკმაოდ ამბიციური გეგმები შსს-ს რამდენიმე მიმართულებასთან დაკავშირებით. ეს არის სასაზღვრო პოლიციის გაძლიერება, საზღვრებზე კიდევ უფრო მეტი კონტროლის მექანიზმის შექმნა, სანაპირო დაცვის მიმართულებით ახალი აღჭურვილობის, ახალი ტექნიკური საშუალებების შეძენა და საპატრულო პოლიციის მიმართულებითაც გვაქვს გეგმები“, - განაცხადა გეკა გელაძემ.