ირაკლი ნადარეიშვილი: ბუნებაში არ მოიპოვება მსგავსი ტიპის კომერციული ხელშეკრულებები, რომლებიც არის საჯარო, ვინაიდან უმეტესწილად კერძო კომპანიის „იგლ ჰილსის“ ინტერესს წარმოადგენს, რომ დეტალები არ იყოს გასაჯაროებული

 ბუნებაში არ მოიპოვება მსგავსი ტიპის კომერციული ხელშეკრულებები, რომლებიც არის საჯარო, ვინაიდან უმეტესწილად კერძო კომპანიის „იგლ ჰილსის“ ინტერესს წარმოადგენს, რომ დეტალები არ იყოს გასაჯაროებული, - განაცხადა გადაცემაში „იმედის კვირა“ ეკონომიკისა და მდგრადი განვითარების მინისტრის მოადგილე ირაკლი ნადარეიშვილმა ოპოზიციის მხრიდან „იგლ ჰილსის“ პროექტის კრიტიკაზე საუბრისას.

მისივე თქმით, ეს არის გლობალური კომპანია, რომელიც მთელი მსოფლიოს მასშტაბით ოპერირებს და წინ კიდევ მრავალი პროექტი აქვთ.

„მათი ინტერესი არ არის, რომ თითოეულ სახელმწიფოსთან, თითოეულ პროექტზე დადებული ასეთი კომპლექსური ხელშეკრულების დეტალები იყოს საჯარო, რადგან ეს მათ ხელს შეუშლის მოლაპარაკების წარმატებით წარმოებაში სხვა სახელმწიფოებთან.

საქართველო აღნიშნულ პროექტში მონაწილეობს, როგორც 33,33%-ს მფლობელი მხარე. გასაჯაროებულია ის ინფორმაცია, რომ სახელმწიფოს არ აქვს არავითარი ფინანსური ვალდებულებები პროექტის დაფინანსებასთან დაკავშირებით. უპირობო ვალდებულება ფინანსებით უზრუნველყოფის პროექტის არის „იგლ ჰილსის“ მხარეს. შეგვიძლია ვთქვათ, რომ არავითარი ტიპის არც ფინანსური, არც სხვა სახის გარანტიები სახელმწიფოს ამ შეთანხმების ფარგლებში არ აქვს გაცემული“, - აღნიშნა ირაკლი ნადარეიშვილმა.

საქართველოს პრემიერ-მინისტრმა ირაკლი კობახიძემ „იგლ ჰილსის“ პროექტთან დაკავშირებით ისაუბრა და განაცხადა, რომ როდესაც ერთ საინვესტიციო პროექტს ქვეყნის განვითარებისთვის ეფექტი მოაქვს, გასაკვირი არაა, რომ საქართველოს უცხოტომელი არაკეთილმოსურნეები მის წინააღმდეგ აქტიურობენ და საკუთარ აგენტურას სრული ძალისხმევით ამუშავებენ.