ირაკლი ზარქუა: ეტყობა, კაპიტანმა გიგაურმა, რაც მიიღო „სპისოკი“, იმ „სპისოკში“ არ ეწერა სააკაშვილი, იქიდანაც კი ჩამოწერილია და სერიოზულად არ აღიქვამენ

მმართველი გუნდის დეპუტატი ირაკლი ზარქუა „საერთაშორისო გამჭვირვალობა - საქართველოს“ მიერ გამოქვეყნებულ სიას გამოეხმაურა და აღნიშნა, რონ „ქართული ოცნების“ მმართველობის პერიოდში, ქვეყანას პოლიტპატიმრები არ ჰყავს.

ზარქუამ, ასევე, შეაფასა „ენმ“-ისა და მიხეილ სააკაშვილის უკმაყოფილება, რომ სიაში სააკაშვილი ვერ მოხვდა.

ზარქუას შეფასებით, მიხეილ სააკაშვილი ყველას „ჩამოწერილი ჰყავს“.

„ჩვენი მმართველობის დროს, საქართველოს არც ჰყოლია და არც ეყოლება პოლიტპატიმარი. ადამიანი იხდის სასჯელს კონკრეტული დანაშაულების გამო, რომლებიც დამტკიცებულია მტკიცებულებებით. ეტყობა კაპიტანმა გიგაურმა, რაც მიიღო „სპისოკი“ იმ „სპისოკში“ არ ეწერა სააკაშვილი, ანუ ჩამოწერილია, იქიდანაც კი ჩამოწერილია და სერიოზულად არ აღიქვამენ.

მგონი, ბელადის აღზევება წარსულს ჰბარდება კოლექტიურ „ნაცმოძრაობაშიც“, იქაც კი არ აღიარებენ უკვე. ახლა ამ კაცმა, რა ქნას, არც აქანა მიიღონ, არც იქანა დარჩეს?! - დარჩა ასე, „ლუზერად“, რაც იყო თავიდან ბოლომდე.

შენ როდესაც შენი ქვეყნის, ხალხის, ტრადიციებისა და ეკლესიის წინააღმდეგ გაილაშქრებ, ბუნებრივია, შენებიც კი მიგატოვებენ. ეს „უსამშობლოები“ კაპიტანი გიგაური და მისი მთელი აგენტურა, ისინიც კი არ გაგითვალისწინებენ, რადგან ჩამოწერილი, „ლუზერი“ კაცი არავის არ სჭირდება. მგონი, მხოლოდ ქალბატონი ნანულა შერჩა“, - აღნიშნა ირაკლი ზარქუამ.