კახა კალაძე: „ფერარის“ შემოსვლა საქართველოში შედეგია იმ პოლიტიკისა, რომელსაც ჩვენი გუნდი ატარებს

 დღევანდელი ღონისძიება არის შედეგი იმ პოლიტიკისა, რომელსაც ჩვენი გუნდი ატარებს - სწორედ ამ პოლიტიკის შედეგად ამ მასშტაბისა და სიდიდის ბრენდები შემოდიან საქართველოში, - განაცხადა თბილისის მერმა, კახა კალაძემ დედაქალაქში „ფერარის“ ოფიციალური შოურუმის გახსნის ცერემონიალზე სიტყვით გამოსვლისას.

მერი ღონისძიებას პრემიერ-მინისტრ ირაკლი კობახიძესა და ეკონომიკური განვითარების მინისტრ მარიამ ქვრივიშვილთან ერთად დაესწრო.

კახა კალაძემ მადლობა გადაუხადა „ფერარის“ ევროპისა და აფრიკის პრეზიდენტს რენო დე პოლის და „ნაზარ ჰოლდინგის“ დამფუძნებელ ალი ნაზარს და საქმიანობაში წარმატებები უსურვა.

„დღეს მართლაც ძალიან მნიშვნელოვანი დღეა ჩვენი ქვეყნისა და ქალაქისთვის, ვინაიდან ასეთი დიდი ბრენდის შემოსვლა ქვეყნის იმიჯისთვის არის ძალიან მნიშვნელოვანი და სასიხარულო. თუმცა, ცხადია, შემთხვევით არაფერი ხდება. მინდა, მადლობა გადავუხადო ბატონ პრემიერ-მინისტრს, რადგან დღევანდელი ღონისძიება არის შედეგი იმ პოლიტიკისა, რომელსაც ჩვენი გუნდი ატარებს. სწორედ ამ პოლიტიკის შედეგად ამ მასშტაბის და სიდიდის ბრენდები შემოდიან საქართველოში, იმიტომ, რომ ეკონომიკური განვითარების თვალსაზრისით ქვეყანა წინ მიდის, ბიზნესის კეთების თვალსაზრისით კი ერთ-ერთი მოწინავე ვართ ევროპის ქვეყნებთან მიმართებით. ძალიან მიხარია დღევანდელი ღონისძიება. მიხარია, რომ პატარა წვლილი მეც მაქვს შეტანილი იმაში, რომ „ფერარი“ შემოვიდა საქართველოში და ჩვენს ულამაზეს დედაქალაქში იხსნება პირველი ფილიალი“, - განაცხადა კახა კალაძემ.

თბილისში „ფერარის“ ოფიციალური შოურუმი გაიხსნა. იტალიური ბრენდი საქართველოში Nazar Group-ის პარტნიორობით შემოვიდა.