ლევან მახაშვილი: ძალიან საინტერესო და საგულისხმო კვლევა გამოქვეყნდა ევროკომისიის მიერ - მარტა კოსმა, კაია კალასმა და სხვებმა შეიძლება პოლიტიკურ განცხადებებში უგულებელყონ საქართველო, მაგრამ გეოგრაფიას ვერავინ უგულებელყოფს

მარტა კოსმა, კაია კალასმა და სხვებმა, შეიძლება პოლიტიკურ განცხადებებში უგულებელყონ საქართველო, მაგრამ გეოგრაფიას ვერავინ ვერ უგულებელყოფს, - განაცხადა ევროპასთან ინტეგრაციის საპარლამენტო კომიტეტის თავმჯდომარე ლევან მახაშვილმა. ამ კომენტარით დეპუტატი გამოეხმაურა ევროკომისიის მიერ გამოქვეყნებულ მეტა კვლევის დოკუმენტს, რომელშიც ხაზგასმულია, რომ საქართველო ევროკავშირისთვის ცენტრალურ აზიასთან დამაკავშირებელი გზაა.

მახაშვილი იმედს გამოთქვამს, რომ ეს კვლევა არის ერთ-ერთი ნაბიჯი საქართველოსთან კონსტრუქციული ურთიერთობების აღდგენისკენ.

„ძალიან საინტერესო და საგულისხმო კვლევა გამოქვეყნდა თავად ევროკავშირის - ევროკომისიის გაფართოებისა და აღმოსავლეთ სამეზობლოს გენერალური დირექტორის მიერ, რაც არის საუკეთესო პასუხი მათსავე ხელმძღვანელებისთვის; ვგულისხმობ მარტა კოსს, კაია კალასს და სხვებს, რომლებიც საქართველოს უსამართლოდ აკრიტიკებენ ხოლმე - შეიძლება მათ პოლიტიკურ განცხადებებში უგულებელყონ საქართველო, მაგრამ გეოგრაფიას ვერავინ ვერ უგულებელყოფს. როდესაც საქმე ეხება ევროკავშირის ურთიერთობებს ცენტრალურ აზიასთან, შუა კორიდორს, ამ სავაჭრო დერეფნის განვითარებას, დასავლეთისა და აღმოსავლეთის დაკავშირებას, საქართველოს ამ შემთხვევაში აქვს სტრატეგიულად უმნიშვნელოვანესი საკვანძო როლი და ადგილი ამ პროცესში. საქართველოს ხელისუფლება აკეთებს ყველაფერს ამ სავაჭრო დერეფნის განვითარებისთვის, იქმნება უამრავი ინფრასტრუქტურა, იხვეწება, ჰარმონიზდება რეგულაციები, რომ მარტივი იყოს ბიზნესებისთვის დასავლეთიდან აღმოსავლეთში გადაადგილება და პირიქით. ერთადერთი რაც აკლია ამას, არის ევროკავშირის მხრიდან ნორმალური, სტრატეგიულად სწორი გადაწყვეტილებების მიღება, ვგულისხმობ საქართველოსთან დიალოგში ჩართვას. ჩვენი იმედი გვაქვს, რომ ეს კვლევაც არის ერთ-ერთი კარგი, პირველი ნაბიჯი ამ კონსტრუქციული ურთიერთობისკენ“, - განაცხადა მახაშვილმა.

ევროკომისიისთვის საქართველო „შუა დერეფანია - „კარიბჭე“ და რეგიონული ენერგეტიკული, თუ ციფრული ჰაბი. ევროკომისიამ მეტა კვლევის დოკუმენტი გამოაქვეყნა, რომელიც რამდენიმე პუნქტისგან შედგება. ხაზგასმულია, რომ საქართველო ევროკავშირისთვის ცენტრალურ აზიასთან დამაკავშირებელი გზაა. როგორც დოკუმენტშია აღნიშნული, ქვეყნის ევროპულ სტანდარტებთან თავსებადობა ევროპის ეკონომიკურ უსაფრთხოებაზე პირდაპირ აისახება.