მე დავამარცხე კიბო! მტანჯავდა, მაგრამ მაინც ვიბრძოდი, ჩუმად ვიბრძოდი - თამო არაბული

პროფესიით დრამის რეჟისორი და ფლორისტი, თამო არაბული, რომელიც 6 თვის განმავლობაში სიმსივნეს ებრძოდა, ფეისბუკის საკუთარ გვერდზე წერს, რომ დაავადება დაამარცხა და ბრძოლისკენ მოუწოდებს ყველა იმ ადამიანს, ვისაც სიმსივნესთან დაკავშირებული პრობლემა აქვს.

"როცა თავის ტვინში უზარმაზარი სიმსივნის არსებობა დამიდგინდა, ტომოგრაფიიდან გამოსულს მახსოვს ჩემი დის ნამტირალევი თვალები, რომელიც ვერ მატყუებდა, რომ ეს სიმსივნე კი არა, ინსულტი იყო, არა და მე უკვე მითხრეს, რომ სიმსივნესთან მქონდა საქმე. არაა, არ შემშინებია, დიდი ხანია ვგრძნობდი მის არსებობას ჩემ თავში, ვგრძნობდი როგორ ნელ-ნელა იზრდებოდა, არც მაშინ შემშინებია. ჩემი დის თვალებმა უფრო შემაშინა,რატომ უნდა ეტირა ჩემი გულისთვის, რატომ უნდა ედარდა იგივე დარდით, რაც უკვე გადატანილი გვქონდა სულ რაღაც 10წლის წინ?! მე ზუსტად ვიცოდი, რომ კიბო ვერ დამამარცხებდა, რომ ყველაფერს გავაკეთებდი პირიქით მომხდარიყო და მისი უძლურება ადამიანის წინაშე დამემტკიცებინა! 

დაიწყო დიდი ბრძოლა, პირველ რიგში კარგი ექიმი უნდა მეპოვა, ისეთივე ბრძოლის ჟინით სავსე, როგორც მე ვიყავი. ბევრი შეხვედრების და ძიების შემდეგ არჩევანი ბატონ ლადო წიქარიშვილზე შევაჩერე, რამ განაპირობა ეს? ბევრი ლაპარაკის გარეშე, შეხედა ტომოგრაფიის სურათს და თქვა - ,,მე ამ სიმსივნეს 95%-ით ამოვიღებ!".  დავიჯერე რომ ძალიან მაგარ ექიმს მივაგენი და ის იყო  ადამიანი, რომელიც მაქსიმუმს გააკეთებდა თავის საქმისას, არც შევმცდარვარ! მან იმაზე მეტი გააკეთა, ვიდრე ველოდი.

ოპერაციიდან 5 თვე გავიდა, რაც არ იყო მარტივი და ჩვეულებრივი 5 თვე. სიმსივნესთან ბრძოლა გრძელდებოდა რადიაციული დასხივებით და ქიმიოთერაპიით, რომელიც მთლიანად ცვლიდა დღეებს, საათებს და ყველაფერს ჩემ ორგანიზმში. განუწყვეტელი პრობლემები, პირღებინება, სისუსტე, კანკალი, უმადობა და კიდევ ბევრი უცნაური რამ, რომელიც მტანჯავდა და მაღიზიანებდა, მაგრამ მე მაინც ვიბრძოდი, ჩუმად ვიბრძოდი. ვიცოდი რასთან მქონდა საქმე და რომ კიდევ უარესის მოლოდინში უნდა ვყოფილიყავი თუ ამას ვერ გავუძლებდი,რომ შეიძლებოდა მეტი ადამიანი დამეტანჯა მერე. 

დღეს ბრძოლა დასასრულს უახლოვდება, დღეს სიმსივნე გაჩერდა და სიხარულით აივსო ყველა ექიმის და იმ ადამიანის გული, ვინც მგულშემატკივრობდა, მე ვამარცხებ მას და მინდა ეს ყველა სიმსივნიანისთვის იყოს მაგალითი ,,შენმა რწმენამ გადაგარჩინოს" დევიზით.

ირწმუნეთ თქვენი ძალის და შესაძლებლობის, ვიღაცისთვის ან რაღაცისთვის იბრძოლეთ და არა სიმივნისთვის, დაივიწყეთ სიმსივნის არსებობა თქვენში, კარგი მომავლისთვის იბრძოლეთ! მადლიერი ვარ ყველა ექიმის, ყველა ადამიანის, რომლებიც ყოველდღე ცდილობდნე ჩემ გამხნევებას,მე კიდევ ძალიან დიდხანს ვიქნები თქვენ გვერდით, კიდევ ბევრ ლამაზ, დღეს ვაჩუქებ ადამიანებს",-წერს, თამო არაბული.

ასევე დაგაინტერე­­­­სებთ:

🔵„ბოლო 10 წელში სიღარიბე გაუარესდა“ - NDI გამოკითხული მოსახლეობის უმრავლესობა

🔵ეს წმინდა ნინის ვაზის ჯვარია და 1700 წლისაა, გადმოცემით მას ორი ამბავი უკავშირდება - რა ისტორიას ყვება გოგა ჩანადირი

🔵"11 წელი მოიხადა, გამოვიდა და ახლა მოკლა" - რა ახალი დეტალები ირკვევა კახეთში მომხდარ მკვლელობაზე