მიხეილ სააკაშვილს PCR ტესტი აუღეს

საქართველოს მესამე პრეზიდენტის, მიხეილ სააკაშვილის ადვოკატის, დიმიტრი საძაგლიშვილის განცხადებით,  მიხეილ სააკაშვილს PCR ტესტი აუღეს.

როგორც ადვოკატმა განმარტა, ტესტი საჭირო მას შემდეგ გახდა, რაც მე-18 დაწესებულების ხელმძღვანელს კორონავირუსი დაუდასტურდა.

"ეს ინფორმაცია მედიიდან გახდა ცნობილი. ვკითხეთ მიხეილ სააკაშვილს, ჰქონდა თუ არა კონტაქტი ნომერ მე-18 დაწესებულების დირექტორთან, რაზედაც დაგვიდასტურა, რომ ჰქონდა და არაერთხელ.

უცნობია, როდის ჰქონდა ბოლო კონტაქტი, თუმცა, დღეს დილას აუღეს მას PCR ტესტი და ველოდებით ტესტის პასუხს", – განაცხადა საძაგლიშვილმა.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან შიმშილობს. იგი ამჟამად იმყოფება სასჯელაღსრულების სისტემის მე-18 სამკურნალო დაწესებულებაში. 11 ნოემბერს მიხეილ სააკაშვილმა განაცხადა, რომ მაღალტექნოლოგიურ კლინიკაში, გარდა გორის სამხედრო ჰოსპიტლისა, გადაყვანის შემთხვევაში, მზად არის შიმშილობა შეწყვიტოს.

ასევე დაგაინტერესებთ:

🔲 "საკმარისია, ზვიად გამსახურდია როგორ მოგვიკლეს რუსებმა" - ზუგდიდში მედიკოსებმა ექსპრეზიდენტის კლინიკაში გადაყვანის მოთხოვნით სოლიდარობის აქცია გამართეს

🔲 "მგონი, კადაფიც კი არ იძახებდა თვითმფრინავით სუშს, 100 ათას დოლარად" - ამირან სალუქვაძე, მიხეილ სააკაშვილის მიერ ბიუჯეტიდან 9 მილიონის გაფლანგვაზე