ნიკა მელია უარს აცხადებს ამნისტიაზე, რომელიც 20 ივნისის მოვლენებს ეხება

პარტია "ერთიანი ნაციონალური მოძრაობის" ლიდერი ნიკა მელია უარს აცხადებს ამნისტიაზე, რომელიც 2019 წლის 20-21 ივნისის „გავრილოვის ღამედ“ წოდებული საპროტესტო აქციის ფიგურანტებზე გავრცელდა.

„ჩემი საბოლოო პასუხი ამნისტიაზე არის – „არა“! მორჩეს და გათავდეს ამაზე საუბარი. ეს ადამიანები ითხოვენ ჩემგან თანხმობას, რომ მე ვატრიალებდი სახელმწიფოს! ეს სპეკულაციები, განსაკუთრებით საარჩევნო კამპანიის პროცესში, ერთხელ და სამუდამოდ რომ დასრულდეს, სპეციალურად მოვედი. მოვედი, საბოლოო პასუხი ვთქვა – არანაირი თანხმობა ბიძინა ივანიშვილის სასამართლოს ჩემი მხრიდან, რომ მე მას ახლა მოწყალება ვთხოვო, ჩემზე გავრცელდეს ის, რაც არ ჩამიდენია“, – განაცხადა ნიკა მელიამ.

20 ივნისის ღამეს დაშავდა 240 ადამიანი. ათობით ადამიანი დაიჭრა, ორმა ახალგაზრდამ თვალი დაკარგა.

გამოძიების ვერსიით, დღემდე საქმის ფიგურანტები იყვნენ აქციის 18 მონაწილე, მათ შორის „ერთიანი ნაციონალური მოძრაობის“ ლიდერი ნიკა მელია და სამი პოლიციელი.

7 სექტემბერს პარლამენტმა დაამტკიცა კანონი ამნისტიის შესახებ, რომელიც სისხლის სამართლის პასუხისმგებლობისგან ათავისუფლებს ყველა პირს, ვინც ჩაიდინა ან ბრალდებულია დანაშაულის ორგანიზებაში და მონაწილეობაში, რომელიც 20-21 ივნისის მოვლენებს უკავშირდება.

მათ შორის ეს ეხება პოლიციელებს, რომლებმაც უფლებამოსილებას გადაამეტეს, რასაც კატეგორიულად არ ეთანხმებოდა ოპოზიცია.

ამნისტიის კანონი გარკვეული პირობითაა მიღებული – იმ პირებმა, ვისზეც ის ვრცელდება, ამნისტიაზე უარი არ უნდა განაცხადონ.

ნიკა მელია კი მთავარი ბრალდებულია საპროტესტო აქციაზე ჯგუფური ძალადობის ორგანიზებაში. მას ექვსწლიანი პატიმრობა ემუქრება. საქმეს თბილისის საქალაქო სასამართლო იხილავს.