ნინო წილოსანი „ლელოსა“ და გახარიას პარტიაზე: ის, რომ ვერანაირ ხელშესახებ შედეგს ვერ მიაღწევენ არჩევნებში, ამას ადასტურებს ის, რომ 64 მუნიციპალიტეტიდან მერობის კანდიდატი 37-ზე მეტ მუნიციპალიტეტში ვერ დააყენეს

ის, რომ ოპოზიცია ვერანაირ ხელშესახებ შედეგს ვერ მიაღწევს არჩევნებში, ამას ადასტურებს ის, რომ 64 მუნიციპალიტეტიდან მერობის კანდიდატი 37-ზე მეტ მუნიციპალიტეტში ვერ დააყენა, - განაცხადა პარლამენტის ვიცე-სპიკერმა, ნინო წილოსანმა გადაცემაში „იმედი LIVE“ „ლელოსა“ და გახარიას პარტიებზე საუბრისას.

როგორც ნინო წილოსანმა აღნიშნა, „ლელო“ და გახარიას პარტია ერთ მხარდამჭერსაც ვერ პოულობს რიგ ადმინისტრაციულ ერთეულებში, რომ მინიმუმ კანდიდატად დააყენონ.

„როდესაც გვეუბნებიან, რომ 64-ვე მუნიციპალიტეტში ჰყავთ საკრებულოს კანდიდატები, თითქმის ნახევარზე მეტში არ ჰყავთ დაყენებული მაჟორიტარობის კანდიდატები და ეს მიუთითებს იმას, რომ მათივე პარტიის წარმომადგენლებსაც აღარ უნდათ აფილირება ამ წაგებულ ომში „ლელოსთან“ და გახარიასთან. ერთ მხარდამჭერსაც ვერ პოულობენ რიგ ადმინისტრაციულ ერთეულებში, რომ მინიმუმ კანდიდატად დააყენონ.

ეს არის სურათი, რომელსაც თავად ყველაზე უკეთ იაზრებენ, თუმცა აქვთ მოლოდინი, რომ რადიკალიზებულ, „დედა ნაც“ პარტიიდან გამომდინარე, მათ გარკვეული ამომრჩეველი დაემატებათ და 3-4%-იან ზღვარს ასცდებიან, რომელსაც აქამდე იღებდნენ.

ასევე, არ უნდა დაგვავიწყდეს, რომ მათი ამომრჩეველი მნიშვნელოვნად იმედგაცრუებულია იმ პოლიტიკით, რომელსაც ისინი აწარმოებდნენ, მათ შორის იმ თაღლითობებით, რომლითაც „ლელოს“ ლიდერები განსაკუთრებულად გამორჩეულები არიან და ასევე გიორგი გახარიას მოქმედებებით, რომელიც გერმანიის ბინადარი გახდა და საქართველოს მოსახლეობას ხმებს სთხოვს. ეს ყველაფერი მნიშვნელოვნად იმოქმედებს მათივე ამომრჩეველზე“, - აღნიშნა ნინო წილოსანმა.

„ლელოს“ და გახარიას პარტიას, 30-ამდე მუნიციპალიტეტში მერობის კანდიდატები არ დაუსახელებია.