პაპუაშვილი: მნიშვნელოვანია, საზოგადოებას მიეცეს შესაძლებლობა, თავად გამოიტანოს დასკვნები არგუმენტების მოსმენით. ეს იყო ოპონენტების სურვილი, ჩაეკეტათ დისკუსია, რათა მოექციათ საკუთარი საინფორმაციო შტურმის ქვეშ საკუთარი მომხრეები

საქართველოს პარლამენტის თავმჯდომარემ შალვა პაპუაშვილმა ტელეკომპანია „იმედის“ გადაცემა „ღია ეთერი - დებატების“ შემდეგ დებატების ფორმატსა და ამ ფორმატის მნიშვნელობაზე ისაუბრა.

„ვფიქრობ, რომ მნიშვნელოვანია, საზოგადოებას მიეცეს შესაძლებლობა, თავად გამოიტანოს დასკვნები არგუმენტების მოსმენით. სწორედ ეს იყო ჩვენი ოპონენტების სურვილი, რომ ჩაეკეტათ ყოველგვარი დისკუსია და დებატი, რათა ცალმხრივად მოექციათ საკუთარი საინფორმაციო შტურმის ქვეშ საკუთარი მომხრეები, რომ არ გაეგოთ ალტერნატიული აზრი. დებატების სიძლიერე სწორედ ეს არის, რომ მიიტანოს ალტერნატიული აზრები მოქალაქეებამდე და შემდეგ ისინი თავად გამოიტანენ თავის დასკვნებს“, - განაცხადა შალვა პაპუაშვილმა.

პარლამენტის თავმჯდომარემ კონკრეტულად დღევანდელი დებატებიც შეაფასა.

„სამწუხაროდ, დღეს რაც ოპონენტებისგან იყო, ეს არის მართლაც ის, რომ ადამიანი რიყეზე გავა და ქვას ვერ დაინახავს - ან ვერ ხედავს ან თავს იბრმავებს ამ შემთხვევაში. საუბრობენ ისე, თითქოს, ამერიკის შეერთებულ შტატებში ისევ ძველი ხელისუფლება იყოს, თითქოს, ახალ ადმინისტრაციას არ დაეხუროს USAID-ი, არ ეღიარებინოს, რომ ამერიკული ფული იხარჯებოდა სხვა ქვეყნებში სხვადასხვა დაპირისპირების შესატანად, არარსებული იდეოლოგიების თავზე მოსახვევად. არ იმჩნევენ იმას, რომ დღეს უკვე ევროკავშირი, ევროსაბჭო, სხვადასხვა ქვეყანა მსჯელობენ და იღებენ კანონებს უცხოური დაფინანსების გამჭვირვალობასთან დაკავშირებით.

[ოპონენტები] დღესაც იგივე არგუმენტებით არიან, რაც ჰქონდათ 3 წლის წინ - რომ „არა, ყველაფერი გამჭვირვალეა, არანაირი პრობლემა არ არის“ მაშინ, როდესაც ვნახეთ „მოლოტოვის კოქტეილების“ კამპანიის დაფინანსება უცხოური თანხებით, პარტიების შემოვლითი დაფინანსება, ესტონეთში სხვადასხვა ორგანიზაციის რეგისტრაციის ყალბი სქემები. ეს ყველაფერი ფაქტებია, მაგრამ როგორც ჩანს, ფაქტების შემჩნევაც ზოგიერთს არ უნდა ვინაიდან უნდა აღიაროს, რომ ეს პერიოდი მათი არგუმენტები აბსოლუტურ სიყალბეზე იყო დაფუძნებული“, - განაცხადა შალვა პაპუაშვილმა.