პაპუაშვილი კუპრაშვილს: მახსოვს 2023 წლის განხილვები, ქალბატონი ნათიაც იყო ამის მონაწილე. სამწუხაროდ, ისევ იქ ხართ დარჩენილი, თითქოს, დედამიწა არ ბრუნავს, არაფერი მომხდარა, ამერიკაში ხელისუფლება არ შეცვლილა, USAID არ დაკეტილა

მე ერთი იმედგაცრუება უნდა დავაფიქსირო, - განაცხადა გადაცემაში „ღია ეთერი - დებატები“ პარლამენტის თავმჯდომარემ შალვა პაპუაშვილმა და ოპონენტ ნათია კუპრაშვილს მიმართა.

პაპუაშვილმა გაიხსენა 2023 წლის განხილვები და აღნიშნა, რომ კუპრაშვილი ისევ იქ არის დარჩენილი.

„მახსოვს 2023 წლის განხილვები, მათ შორის ქალბატონი ნათიაც [კუპრაშვილი] იყო ამის მონაწილე. სამწუხაროდ, ისევ იქ ხართ დარჩენილი, თითქოს, დედამიწა არ ბრუნავს, არაფერი მომხდარა, ამერიკაში ხელისუფლება არ შეცვლილა, USAID არ დაკეტილა, ომები არ დაწყებულა - არ დამთავრებულა, თითქოს, არაფერი მომხდარა, ისევ იქ ხართ. მართლა ისეთი შთაბეჭდილება მაქვს, რომ სხვადასხვა გაზეთს ვკითხულობთ თუ სხვადასხვა ტელევიზიას ვუყურებთ.

და რატომ - ჩვენ ამასობაში რამდენი რამ გავიარეთ. მათ შორის, ვუყურებდით, როგორ იყო ქართულ არჩევნებში პირდაპირი უცხოური ჩარევა; გარედან მხარდაჭერილი ადამიანები როგორ ამკვიდრებენ სიძულვილის ენას, ძალადობას, როგორ ფინანსდება პოლიტიკა. ეს ყველაფერი ხდება და მართლაც თვალის დახუჭვა, რიყეზე გასვლა და ქვის არდანახვა - ამას რაღაც სპეციფიური დამოკიდებულება სჭირდება ალბათ ან საკუთარი გვირაბის ხედვა, როდესაც გარშემო ვერაფერს ამჩნევთ. ამიტომაც არ უნდოდათ დისკუსია და დებატები - ოპონენტებს ვგულისხმობ, რომ გამოჩნდებოდა არგუმენტები“, - განაცხადა პარლამენტის თავმჯდომარემ.