შალვა პაპუაშვილი ოპონენტებს: კარგი, თქვენ ვერ ხედავთ რიყეზე ქვებს, მაგრამ ევროკავშირი ხედავს, რომელმაც „დემოკრატიის ფარი“ აღმართა

კარგით, თქვენ ვერ ხედავთ რიყეზე ქვებს, მაგრამ ევროკავშირი ხედავს, რომელმაც „დემოკრატიის ფარი“ აღმართა, - განაცხადა ტელეკომპანია „იმედის“ გადაცემაში „ღია ეთერი - დებატები“ პარლამენტის თავმჯდომარე შალვა პაპუაშვილმა.

მისი თქმით, უცხოური ჩარევა, უცხოური ფული უნდა იყოს გამჭვირვალე და მერე საზოგადოება თვითონ დაინახავს რაც არის.

„ისეთი შთაბეჭდილება მრჩება, ხართ პოზიციაში, ადამიანი რიყეზე რომ გავა და ქვას ვერ დაინახავს. მართლაც, თითქოს სამყაროში რა ხდება, ამას ვერ ხვდებით.

კიდევ ერთხელ, არ არის ეს 2023 წელი, როდესაც ჩვენ ვამტკიცებთ რაღაცას უცხოურ დაფინანსებაზე. ეს არის 2026 წელი, გამოვიარეთ 2025 წელი, როდესაც დაიხურა USAID-ი. გახსოვთ ხომ ის კადრები, როგორ დემონსტრაციულად მოხსნეს წარწერა მისი მთავარი ოფისიდან. მთელი ბრალდება, რომელიც დღემდე გრძელდება თუ როგორ იხარჯებოდა უცხოური ფული სხვადასხვა ქვეყანაში. მათ შორის, საქართველოც იყო მოხსენიებული, იმისთვის, რომ შუღლი, დაპირისპირება და პოლიტიკური გავლენა მოეპოვებინა.

კიდევ ერთხელ, „დემოკრატიის ფარი“, კარგით, თქვენ ვერ ხედავთ ამ რიყეზე ქვებს, მაგრამ ევროკავშირი ხედავს, მათ შორის, რომელმაც „დემოკრატიის ფარი“ აღმართა და დასაბუთება და განმარტებები რაც არის ამ „დემოკრატიის ფარში“, თუ რატომ არის უცხოური გავლენის, ჩარევის წინააღმდეგ საჭირო, წაგიკითხავთ: უცხოური ჩარევა წარმოადგენს სერიოზულ დარღვევას იმ უნივერსალური ღირებულებებისა და პრინციპებისა, რომელზეც ევროკავშირი დგას. ასეთ ქმედებებს შეცდომაში შეჰყავს მოქალაქეები, ზემოქმედებს მათ საარჩევნო ქცევაზე, ამძაფრებს გამყოფ დებატებს, იწვევს პოლარიზაციას, იყენებს საზოგადოების სისუსტეს და ა.შ.

აი, ეს არის უცხოური ჩარევა და ამის აწონ-დაწონა კი არ არის საჭირო, კარგი ჩარევა და ცუდი ჩარევა, ასე ვთქვათ, არამედ უცხოური ჩარევა, უცხოური ფული უნდა იყოს გამჭვირვალე და მერე საზოგადოება თვითონ დაინახავს რაც არის“, - აღნიშნა შალვა პაპუაშვილმა.